- పార్టీ నాయకులతో బీఆర్ఎస్వర్కింగ్ ప్రెసిడెంట్ కేటీఆర్
- పాలనకు ఎక్కువ టైం కేటాయించి.. పార్టీకి తక్కువ కేటాయించినం
- ఇకపై పార్టీకి ప్రాధాన్యం ఇస్తామని వెల్లడి
హైదరాబాద్, వెలుగు : ‘‘తెలంగాణను ఎంతో అభివృద్ధి చేశాం.. ఎన్నో సంక్షేమ పథకాలు ఇస్తున్నాం కాబట్టి.. ప్రజలు మనతోనే ఉన్నారని అనుకున్నాం.. అసెంబ్లీ ఎన్నికల వరకు అదే ధీమాలో ఉన్నాం”అని బీఆర్ఎస్ వర్కింగ్ ప్రెసిడెంట్ కేటీఆర్ ఆ పార్టీ నాయకులతోఅన్నారు. బుధవారం తెలంగాణ భవన్లో నిర్వహించిన వరంగల్ లోక్సభ సన్నద్దత సమావేశంలో ఆయన ఈ వ్యాఖ్యలు చేశారు. తెలంగాణ అభివృద్ధి కోసం కేసీఆర్ తన రక్తం, చెమట ధారపోశారని, విధ్వంసమైన తెలంగాణను వికాసం వైపు మళ్లించారని తెలిపారు.
గ్రామీణ ఆర్థిక వ్యవస్థను పరిపుష్టం చేయడానికి కేసీఆర్ పడిన కష్టం దేశంలో ఇంకెవరు పడలేదన్నారు. రాష్ట్రాన్ని వేగంగా అభివృద్ధి చేయాలనే తపనతో 99% సమయం పాలనకు కేటాయించామని, దీంతో పార్టీకి తక్కువ టైం కేటాయించామని తెలిపారు. ఇకపై పార్టీకి ప్రాధాన్యం ఇస్తామని చెప్పారు. ఇలాంటి సమావేశాలు ఎప్పటికప్పుడు నిర్వహిస్తూ పార్టీని బలోపేతం చేస్తామన్నారు. ‘‘మనల్ని ప్రజలు పూర్తిగా తిరస్కరించలేదు.
దానిని గుర్తించి ముందుకు సాగుదాం. బీఆర్ఎస్ను ఉఫ్మని ఊదేస్తామని కొందరు అంటున్నారు. 23 ఏండ్లుగా చాలా మంది ఆ ప్రయత్నాలు చేసి విఫలమయ్యారు. కేసీఆర్ తెలంగాణ ప్రజల గుండెల్లో ఉన్నంత వరకు బీఆర్ఎస్ ఉంటుంది. బీఆర్ఎస్ నులేకుండా చేయడం ఎవరి తరం కాదు. ఇక నుంచి తెలంగాణ భవనే మన అడ్డా. పార్టీ క్యాడర్కు నాతో పాటు సీనియర్ లీడర్లు అందుబాటులో ఉంటారు. పార్టీని ఏకతాటిపైకి తీసుకు వచ్చేందుకు శిక్షణ తరగతులు నిర్వహిస్తాం. పార్టీలో ఆర్ఎస్ఎస్ నుంచి ఆర్ఎస్యూ భావజాలం ఉన్నవాళ్లు ఉన్నారు. అందరం కలిసి జట్టుగా పని చేద్దాం. బీఆర్ఎస్ తెలంగాణ ప్రజల గొంతుక.. పార్లమెంట్ఎన్నికల్లో సత్తా చాటుదాం”అని కేటీఆర్ పిలుపునిచ్చారు.
కేసులకు భయపడేది లేదు
కాంగ్రెస్అధికారంలోకి రాగానే.. బీఆర్ఎస్నాయకులు, కార్యకర్తలపై తప్పుడు కేసులు పెడుతున్నారని, వాటికి భయపడేది లేదని కేటీఆర్ అన్నారు. పార్టీకి పటిష్టమైన లీగల్ సెల్ ఉందని, కేసుల తీవ్రతను బట్టి రాష్ట్ర నాయకత్వం స్పందిస్తుందని తెలిపారు. ఉద్యమాల వీరగడ్డ ఓరుగల్లు అని.. జిల్లాలోని నాయకులు నిత్యం ప్రజల మధ్య ఉన్నా ఓడిపోయారన్నారు. జయశంకర్ సార్ పుట్టిన నేలపై 2014, 2019 లోక్సభ ఎన్నికల్లో వరంగల్ఎంపీ సీటు గెలిచామని, ఈసారి కూడా గులాబీ జెండా ఎగరాలన్నారు.
అసెంబ్లీ ఎన్నికల ఫలితాలను పక్కనబెట్టి లోక్సభ ఎన్నికల్లో విజయంపై దృష్టి పెట్టాలని, కార్యకర్తలను కలుపుకొని పని చేయాలని నాయకులకు సూచించారు. కాంగ్రెస్ ఇచ్చింది 6 గ్యారంటీలు మాత్రమే కాదు.. 420 హామీలన్న విషయం ప్రజలకు గుర్తు చేయాలన్నారు. కేంద్ర ప్రభుత్వ ప్రజా వ్యతిరేక విధానాలను ప్రజల్లోకి తీసుకెళ్లాలన్నారు. సమావేశానికి ఆలస్యంగా వచ్చిన మాజీ ఎమ్మెల్యే వినయ్ భాస్కర్కు కేటీఆర్ చురకలంటించారు.
అసెంబ్లీకి లేటే.. పార్టీ మీటింగ్కు లేటేనా? అని అన్నారు. వచ్చే ఎన్నికల్లో అధికారంలోకి వచ్చేది బీఆర్ఎస్సేనని ఎమ్మెల్యే కడియం శ్రీహరి అన్నారు. ఎన్నికలు ఎప్పుడు వచ్చినా కాంగ్రెస్ పార్టీకి కనీసం ప్రతిపక్ష హోదా కూడా రాదన్నారు. ఇచ్చిన హామీలను అమలు చేయడం కాంగ్రెస్ వల్ల కాదన్నారు. కేసీఆర్నాయకత్వంలో అందరం కష్టపడి పనిచేసి లోక్సభ ఎన్నికల్లో పార్టీని గెలిపించుకుందామన్నారు.
