- నేషనల్ గార్డ్స్ మోహరింపును తీవ్రంగా నిరసించిన స్థానికులు
- మాస్క్లతో ముఖం కప్పుకుని రెచ్చిపోయిన ఆందోళనకారులు
- వీధుల్లో తిరుగుతూ కార్లకు నిప్పు
- టియర్గ్యాస్, రబ్బర్ బుల్లెట్లు ప్రయోగించిన పోలీసులు మాస్కుతో కనిపించిన వాళ్లందరినీ అరెస్ట్ చేయాలని ట్రంప్ ఆర్డర్
లాస్ఏంజెల్స్: అమెరికాలోని లాస్ఏంజెల్స్ నగరం రణరంగంగా మారింది. అక్రమ వలసదారుల ఏరివేతకు నిరసనగా స్థానికులు చేపట్టిన ఆందోళనలు వరుసగా మూడోరోజూ కొనసాగాయి. ప్రెసిడెంట్ డొనాల్డ్ ట్రంప్ నేషనల్ గార్డ్స్ను మోహరించగా.. ఈ నిర్ణయంపై మండిపడుతూ వేలాదిమంది రోడ్లపైకి వచ్చారు. దీంతో సిటీలో ఉద్రిక్తత నెలకొన్నది.
ఇమిగ్రేషన్‌ అండ్‌ కస్టమ్స్‌ ఎన్‌‌‌‌‌‌‌‌ఫోర్స్‌‌‌‌‌‌‌‌మెంట్‌(ఐసీఈ) విభాగానికి వ్యతిరేకంగా ఆందోళన చేస్తున్న 2 వేల మంది ఆందోళనకారులు డౌన్‌‌‌‌‌‌‌‌టౌన్‌‌‌‌‌‌‌‌లోని ప్రధాన హైవేను తమ కంట్రోల్లోకి తీసుకొన్నారు. ముఖానికి మాస్కులు తొడుక్కొని వీధుల్లో హల్చల్ చేశారు. సెల్ఫ్‌ డ్రైవింగ్‌ కార్లకు నిప్పు పెట్టారు. ఎలక్ట్రిక్ వెహికల్స్ను తగులబెట్టడంతో అవి భారీ శబ్దాలు చేస్తూ పేలిపోయాయి. 101 ఫ్రీ వేను ఆందోళనకారులు అడ్డుకోవడంతో అధికారులు ఆ మార్గాన్ని మూసేశారు.
దీంతో ఆందోళనకారులు పోలీసులపై చేతుల్లో ఉన్న వస్తువులను విసిరారు. పోలీసు వెహికల్స్కు నిప్పుపెట్టారు. ఈ నేపథ్యంలో సిటీలోని వాణిజ్య ప్రాంతమైన డౌన్‌‌‌‌‌‌‌‌టౌన్‌‌‌‌‌‌‌‌లో ఎవరూ గుమిగూడవద్దని పోలీసులు ఆదేశాలు జారీ చేశారు. ఆందోళనకారులను చెదరగొట్టేందుకు భద్రతా దళాలు రబ్బరు బుల్లెట్లు, టియర్ గ్యాస్ ప్రయోగించాయి. లైవ్లో న్యూస్ ప్రెజెంట్ చేస్తున్న ఓ రిపోర్టర్‌‌‌‌‌‌‌‌కు రబ్బరు బుల్లెట్ తగిలి, గాయాలయ్యాయి.
ఆందోళనకారులపై ఉక్కుపాదం
ఇల్లీగల్ ఇమిగ్రెంట్స్ ఏరివేతకు ట్రంప్ సర్కార్‌ మొదలెట్టిన కార్యక్రమం మరింత ఉద్రిక్తంగా మారింది. ఆందోళనలను అణచివేసేందుకు ‘నేషనల్ గార్డ్‌’ బలగాలను ట్రంప్ రంగంలోకి దింపారు. లాస్ఏంజెల్స్ పరిధిలోనే ఏకంగా 2 వేల మంది కాలిఫోర్నియా నేషనల్ గార్డ్స్ మోహరించారు. దీంతో ఆందోళనకారులు తమ నిరసనలను ఉధృతంచేశారు. ఫెడరల్ ఏజెంట్లు, ఎఫ్‌‌‌‌‌‌‌‌బీఐ, పోలీసులకు వ్యతిరేకంగా నినాదాలు చేశారు.
కాగా, ఆందోళనలపై ప్రెసిడెంట్ ట్రంప్ ట్రూత్ వేదికగా విరుచుకుపడ్డారు. ఒకప్పుడు అమెరికాలో గొప్ప నగరమైన లాస్ఏంజెల్స్ను అక్రమ వలసదారులు, క్రిమినల్స్‌ ఆక్రమించారని ఫైర్ అయ్యారు. లాస్ఏంజెల్స్లో మాస్కుతో కనిపిస్తే వెంటనే అరెస్టు చేయాలని పోలీసులకు ఆదేశాలు జారీ చేశారు. ఆందోళనల్లో మాస్క్‌‌‌‌‌‌‌‌ల వినియోగాన్ని ఆయన నిషేధించారు.
