హైదరాబాద్, వెలుగు: రాష్ట్రంలో కాంగ్రెస్ కు వరుస ఓటములు ఎదురవడం విచారకరమని, పార్టీకి తెలంగాణ ప్రజల మద్దతు ఎందుకు రావడం లేదో సమీక్షించాల్సిన అవసరం ఉందని పీసీసీ ప్రచార కమిటీ చైర్మన్ మధు యాష్కీగౌడ్ అన్నారు. ప్రియాంక గాంధీ త్వరలో తెలంగాణ బాధ్యతలు తీసుకోబోతున్నారని, ఆమె వచ్చిన తర్వాత సమీక్షలతోపాటు దిద్దుబాటు చర్యలు కూడా ఉంటాయన్నారు. శుక్రవారం గాంధీభవన్లో ఆయన మీడియాతో మాట్లాడారు. మునుగోడు ఎన్నికల్లో ధన ప్రభావంతోనే ఓడిపోయామని సమర్థించుకోలేమని చెప్పారు. పార్టీ ఎన్నికను సీరియస్గానే తీసుకుందని, నేతలు కలిసి కట్టుగా పని చేశారన్నారు. అయినా ఓడటం ఆలోచించదగ్గ విషయమన్నారు. రాష్ట్రంలో పార్టీని మెరుగుపర్చుకోవాల్సిన టైమ్ వచ్చిందన్నారు.
ఢిల్లీ లిక్కర్ పాలసీపై సీబీఐతో విచారణ జరిపించాలని యాష్కీ డిమాండ్ చేశారు. దేశంలో అత్యధికంగా లిక్కర్ సేల్ జరుగుతున్నది తెలంగాణలోనని, ఇక్కడి పాలసీనే పంజాబ్, ఢిల్లీ కాపీ కొట్టాయన్నారు. డ్రగ్స్ అమ్మకాల్లో కూడా రాష్ట్రం టాప్లో ఉందన్నారు. గతంలో నమోదైన డ్రగ్స్ కేసు ఏమైందో అర్థం కావడం లేదని, ఇప్పుడు లిక్కర్ స్కామ్కు అదే పరిస్థితి కల్పించవద్దని అన్నారు. ప్రధాని రాష్ట్రానికి వచ్చినపుడు టీఆర్ఎస్ గొడవ చేస్తుందని, తర్వాత కేసీఆర్ ఢిల్లీకి వెళ్లి మోడీ కాళ్లమీద పడతారన్నారు. ప్రజల దృష్టి మళ్లించేందుకే బీజేపీ, టీఆర్ఎస్ గొడవ పడతాయన్నారు. ఫోన్ ట్యాపింగ్పై గవర్నర్ తమిళిసైకి అనుమానం ఉంటే హోంశాఖకు ఫిర్యాదు చేయాలన్నారు. తెలంగాణ సర్కార్ ఫోన్ ట్యాప్ చేస్తున్న విషయం నిజమేనని, ప్రతిపక్ష నాయకుల ఫోన్లు కూడా ట్యాప్ చేస్తున్నారన్నారు.
