మధురైలోని తిరుపరకుండ్రం కొండపై ఉన్న దర్గా సమీపంలో దీపం (దీపథూన్) వెలిగించే విషయంలో మద్రాస్ హైకోర్టు కీలక తీర్పునిచ్చింది. అక్కడ దీపం వెలిగించడానికి అనుమతిస్తూ గతంలో ఒక జడ్జి ఇచ్చిన తీర్పును, ఇప్పుడు ఇద్దరు న్యాయమూర్తులతో కూడిన బెంచ్ సమర్థించింది. ఈ విషయంలో తమిళనాడు ప్రభుత్వానికి గట్టి ఎదురుదెబ్బ తగిలింది.
కొండపై ఉన్న ఆ రాతి స్తంభం (దీపథూన్) ఉన్న ప్రాంతం ఖచ్చితంగా సుబ్రమణ్య స్వామి ఆలయానికే చెందుతుందని కోర్టు స్పష్టం చేసింది. శాంతిభద్రతల సమస్యలు వస్తాయని చెప్పి ఆచారాలను ఆపకూడదని, సమస్యలు రాకుండా చూడటం ప్రభుత్వ బాధ్యత అని కోర్టు పేర్కొంది. ప్రభుత్వం ఈ సమస్యను సామరస్యంగా పరిష్కరించి ఉండాల్సిందని అభిప్రాయపడింది. కొండ రక్షిత ప్రాంతం కాబట్టి, భారత పురావస్తు శాఖ (ASI) అధికారులతో చర్చించి, ఎంతమంది వెళ్లి దీపం వెలిగించాలో నిర్ణయించాలని సూచించింది.
అసలు వివాదం ఏంటంటే ?
తిరుపరకుండ్రం కొండ మురుగన్ భక్తులకు అత్యంత పవిత్రమైనది. అక్కడ ఒక దర్గా కూడా ఉంది. 1920 నుంచే ఈ కొండ యాజమాన్యంపై వివాదాలు ఉన్నాయి. అప్పట్లోనే కోర్టులు కొండ అంతా ఆలయానిదేనని, కొన్ని భాగాలు మాత్రమే దర్గాకు చెందుతాయని తీర్పునిచ్చాయి.
1994లో ఒక భక్తుడు దర్గాకు దగ్గరగా ఉండే పాత రాతి స్తంభం దగ్గర దీపం వెలిగించాలని కోరడంతో ఈ వివాదం మళ్లీ మొదలైంది. ఇప్పుడు హైకోర్టు ఇచ్చిన తీర్పుతో అక్కడ దీపం వెలిగించే మార్గం క్లియర్ అయింది. ఈ తీర్పును హిందూ సంఘాలు, మురుగన్ భక్తులు అంగీకరించాయి. ఇది భక్తుల విజయమని, ప్రభుత్వం ఇప్పటికైనా అడ్డంకులు సృష్టించకుండా ఆలయ అధికారుల ద్వారా దీపం వెలిగించే ఏర్పాట్లు చేయాలని కోరుతున్నారు.
