- మహబూబాబాద్ ఎస్పీ సంగ్రామ్ సింగ్జీ పాటిల్
కొత్తగూడ, వెలుగు : మావోయిస్టుల ప్రలోభాలకు లోనుకాకుండా నిర్భయంగా ఓటు హక్కును వినియోగించుకోవాలని మహబూబాబాద్ ఎస్పీ సంగ్రామ్ సింగ్ జీ పాటిల్ సూచించారు. మావోయిస్టు ప్రభావిత కొత్తగూడ, గంగారం మండలాల్లోని సమస్యాత్మక పోలింగ్ స్టేషన్లను మంగళవారం తనిఖీ చేశారు. ఈనెల 30న జరుగుతున్న ఎన్నికల్లో స్వేచ్ఛగా ఓటు వేయాలన్నారు. అంతకు ముందు కొత్తగూడ, గంగారం పోలీస్ స్టేషన్లను తనిఖీ చేసి సిబ్బంది అప్రమత్తంగా ఉండాలని ఆదేశించారు. ఆయన వెంట డీఎస్పీ సత్యనారాయణ, సీఐ ఫణిధర్, ఎస్ఐలు నగేశ్, దీలీప్ ఉన్నారు.
దివ్యాంగులు, వృద్ధులు ఓటుహక్కు తప్పక వినియోగించుకోవాలి
ములుగు, వెలుగు : దివ్యాంగులు, వయోవృద్ధులు తమ ఓటు హక్కును వినియోగించుకొని యువతకు ఆదర్శంగా నిలవాలని ఎన్నికల అధికారిణి, కలెక్టర్ ఇలా త్రిపాఠి సూచించారు. మంగళవారం కలెక్టరేట్ లో అసెంబ్లీ ఎన్నికలు, స్వీప్ కార్యక్రమంలో భాగంగా వృద్ధులు, దివ్యాంగులకు అవగాహన కార్యక్రమం నిర్వహించారు. 80ఏళ్ల పైబడిన వృద్ధుల కోసం ఎన్నికల కమిషన్ ఇంటి నుంచే ఓటు హక్కు వినియోగించుకునే వీలును కల్పించిందన్నారు. వృద్ధులు, దివ్యాంగులు ఓటు హక్కును తప్పనిసరిగా వినియోగించుకొని బాధ్యతను ఇతరులకు వివరించాలన్నారు. ప్రత్యేక ఏర్పాట్లు కూడా పోలింగ్ కేంద్రాల వద్ద చేస్తున్నామన్నారు. ఈ కార్యక్రమంలో డీడబ్ల్యూవో ప్రేమలత, డీపీవో వెంకయ్య, సీడీపీవో స్వాతి తదితరులు పాల్గొన్నారు.
ఎన్నికల ప్రక్రియలో అవకతవకలకు తావివ్వొద్దు
ములుగు, వెలుగు : ఎన్నికల ప్రక్రియలో ఎలాంటి అవకతవకలకు తావివ్వొద్దని, శాంతియుత వాతావరణంలో నామినేషన్ వేసి శాంతిభద్రతలకు సహకరించాలని ఎస్పీ గౌష్ ఆలం సూచించారు. జిల్లా పోలీసు కార్యాలయంలో మంగళవారం పోలీసు అధికారులతో భ్రదతా ఏర్పాట్లపై సమీక్ష నిర్వహించారు. అభ్యర్థులు నామినేషన్ వేసేందుకు బందోబస్తు చర్యలు చేపడుతున్నామని, దానికి అనుగుణంగా సంబంధిత అధికారుల సూచనలు పాటించాలన్నారు. కార్యక్రమంలో ఓఎస్డీ అశోక్ కుమార్, ఏఎస్పీ సిరిశెట్టి సంకీర్త్, అడిషనల్ ఎస్పీ సదానందం, డీఎస్పీ రవీందర్, ఎస్బీ ఇన్స్పెక్టర్ కిరణ్, సీఐలు రంజిత్ కుమార్, శంకర్, ఎస్సైలు అప్పాని వెంకటేశ్వర్, చల్ల రాజు, బి.ఓంకార్ యాదవ్, షేక్ మస్తాన్, కృష్ణప్రసాద్, రవి, తదితరులు పాల్గొన్నారు.
