- లోకల్‌‌‌‌గా వినియోగం పెంచేందుకు జీఎస్టీ రేట్ల తగ్గింపు: మినిస్టర్ గోయల్
న్యూఢిల్లీ: అమెరికా 50శాతం టారిఫ్‌‌‌‌లు విధించిన నేపథ్యంలో, కేంద్ర ప్రభుత్వం ఎగుమతులు, దేశీయ వినియోగాన్ని ప్రోత్సహించేందుకు త్వరలో చర్యలు ప్రకటించనుందని వాణిజ్య మంత్రి పీయూష్ గోయల్ తెలిపారు. యూఎస్ టారిఫ్‌‌‌‌ల ప్రభావం రొయ్యలు, కెమికల్స్, లెదర్, ఫుట్‌‌‌‌వేర్ వంటి కార్మిక ఆధారిత రంగాలపై ఎక్కువగా ఉంటుందని ఎగుమతిదారులు చెబుతున్నారు. ప్రభుత్వం అన్ని రంగాలకు మద్దతు ఇవ్వనుందని, జీఎస్టీ రేట్ల కోతతో దేశీయ తయారీ రంగానికి డిమాండ్ పెరుగుతుందని గోయల్ అభిప్రాయపడ్డారు.
ప్రపంచ మార్కెట్లలో విస్తరించడం, ప్రత్యామ్నాయ మార్కెట్లను వెతుక్కోవడం కోసం వివిధ దేశాలతో చర్చలు జరుగుతున్నాయని చెప్పారు. 2024–25లో భారత్ 825 బిలియన్ డాలర్లు ఎగుమతులు (వస్తువులు, సర్వీస్‌‌‌‌లు కలిపి) నమోదు చేసింది. “ఈ సంవత్సరం ఎగుమతులు గత సంవత్సరం కంటే ఎక్కువగా ఉంటాయి” అని గోయల్ ధీమా వ్యక్తం చేశారు. ఆస్ట్రేలియాలో 10 లక్షల ఇళ్లకు డిమాండ్ ఉందని, భారత నిర్మాణ రంగం ఈ అవకాశాన్ని వినియోగించుకోవాలని పిలుపునిచ్చారు.
