చేర్యాల, వెలుగు : తెలంగాణ తొలి, మలి దశ ఉద్యమాలకు చేర్యాల ప్రాంతమే పునాది అని మాజీ ఎమ్మెల్యే కొమ్మూరి ప్రతాపరెడ్డి అన్నారు. మంగళవారం మండలంలోని కడవేర్గు గ్రామంలో కాంగ్రెస్ముఖ్య కార్యకర్తల సమావేశం నిర్వహించారు. ఈ సందర్భంగా ఆయన మాట్లాడుతూ.. సీఎం కేసీఆర్ మలి దశ ఉద్యమం ఇక్కడి నుంచే ప్రారంభించారని, అలాంటి ఉద్యమ ప్రాంతాన్ని గాలికొదిలేశారని విమర్శించారు. చేర్యాల రెవెన్యూ డివిజన్ కోసం జేఏసీల ద్వారా ఉద్యమం జరుగుతుంటే పల్లా రాజేశ్వర్ రెడ్డి వారిని రాజకీయ నిరుద్యోగులనడం సిగ్గుచేటన్నారు.
పిడికెడు మందితో రెవెన్యూ డివిజన్ వస్తుందా అనడం ఆయన నీతికి నిదర్శనమన్నారు. ఆయనకు ఇక్కడి నుంచి పోటీ చేసే అర్హత లేదని హెచ్చరించారు. ఈ సందర్భంగా నర్సాయపల్లి గ్రామానికి చెందిన 200 మంది బీఆర్ఎస్ నాయకులు కాంగ్రెస్లో చేరారు. కార్యక్రమంలో కడవేర్గు, పోతిరెడ్డిపల్లి, పెద్దరాజుపేట గ్రామాలకు చెందిన కాంగ్రెస్ నాయకులు, కార్యకర్తలు పాల్గొన్నారు.
