వరంగల్ క్రైం, వెలుగు: ఎనిమిదేండ్ల కింద మతిస్థిమితం సరిగా లేక ఇంటి నుంచి బయటికి వెళ్లి తప్పిపోయిన తల్లిని వాట్సాప్ బిడ్డల దగ్గరకు చేర్చింది. పోలీసులు తెలిపిన వివరాల ప్రకారం.. మహబూబాబాద్ జిల్లా కేంద్రానికి చెందిన రేగళ్ల రాంరెడ్డి, -అమృతమ్మ దంపతులకు స్రవంతి, ప్రవీణ్ అనే ఇద్దరు పిల్లలు ఉన్నారు. బతుకుదెరువు కోసం కొన్నేండ్ల కింద ఖమ్మం వెళ్లి చికెన్సెంటర్ స్టార్ట్ చేశారు. 2013లో అమృతమ్మకు మతిస్థిమితం సరిగా లేక ఇంటి నుంచి బయటకు వెళ్లి తిరిగి రాలేదు. అమృతమ్మ పశ్చిమ బెంగాల్లోని ముషీరాబాద్ జిల్లా బెల్డంగ స్వధార్ హోంకు చేరింది. ఇటీవల అమృతమ్మ ఆరోగ్యం కుదుటపడి గతం గుర్తొచ్చింది. తనది మహబూబాబాద్ అని స్వధార్ హోం ఆఫీసర్లకు తెలిసింది. వాళ్లు ఆమె ఫొటోలను వరంగల్ కమిషనరేట్ కు పంపించారు. సీపీ తరుణ్జోషి సూచనలతో పోలీసులు అమృతమ్మ ఫొటోలను వాట్సాప్ ద్వారా సర్క్యులేట్ చేశారు. వాటిని చూసిన రాంరెడ్డి పోలీసులను సంప్రదించాడు. సీపీ చొరవతో అమృతమ్మను వరంగల్ తీసుకొచ్చి ఆదివారం కుటుంబ సభ్యులకు అప్పగించారు.
