- ప్రజలు హ్యాపీగా ఉన్నరు.. ఖద్దరు చొక్కాలోల్లే ఖుషీగా లేరు
- రూ.80 వేల కోట్ల ప్రాజెక్టులో లక్ష కోట్ల అవినీతి ఎట్లయితది
- రాహుల్ జీ.. ఓసారికాళేశ్వరం చూసి రండి
- రాసిచ్చిన స్క్రిప్ట్లనే ఆయన చదువుతున్నడని విమర్శ
హైదరాబాద్, వెలుగు: పీసీసీ చీఫ్ రేవంత్రెడ్డి.. బీజేపీ కోవర్టు అని మంత్రి కేటీఆర్ ఆరోపించారు. పదో, పన్నెండు మందో ఎమ్మెల్యేలు గెలిస్తే.. వాళ్లందరినీ గంపగుత్తగా తీసుకుని బీజేపీలోకి వెళ్తాడని చెప్పారు. ఈ విషయం రాహుల్గాంధీకే తెలియదన్నారు. గురువారం తెలంగాణ భవన్లో నిర్వహించిన దివ్యాంగుల కృతజ్ఞత సభలో కేటీఆర్ పాల్గొని మాట్లాడారు. కాంగ్రెస్ లీడర్లు ప్రజల దగ్గరికి వచ్చి అధికారం ఇవ్వాలని అడుగుతున్నారని.. వాళ్లు పవర్లో ఉన్నప్పుడు కరెంట్, సాగు, తాగు నీరు, పెన్షన్లు సక్కగ ఇచ్చిన్రా అని ఆయన ప్రశ్నించారు.
‘‘పండుగొస్తే గంగిరెద్దులోళ్లు వచ్చినట్టు, ఎలక్షన్లు వచ్చినప్పుడు రాజకీయ పార్టీలు మీ చుట్టూ తిరుగుతాయి. వాళ్లను చూసి ఆగం కావొద్దు. ఒక్కొక్కరు పది మందిని తయారు చేసి బీఆర్ఎస్కు ఓట్లెయ్యాలి” అని పిలుపునిచ్చారు. ‘మాకంటే శారీరక వైకల్యం ఉంది.. మీకు ఏమైంది మానసిక వైకల్యం ఉందా? గా పార్టీ గురించి ఎవడైనా ఆలోచిస్తడా?’ అని ప్రజలను చైతన్యవంతులను చేయాలని దివ్యాంగులకు సూచించారు.
మీరా.. కుటుంబ పాలన గురించి మాట్లాడేది?
రాహుల్గాంధీ, ప్రియాంక గాంధీ నోటికి వచ్చినట్టు మాట్లాడుతున్నాడని కేటీఆర్ మండిపడ్డారు. ‘‘కేసీఆర్ది కుటుంబ పాలన అంటున్న రాహుల్గాంధీ ఎవడసలు? జవహర్లాల్నెహ్రూ బిడ్డ ఇందిరాగాంధీ కొడుకు రాజీవ్గాంధీ భార్య సోనియాగాంధీ కొడుకు ఇక్కడికొచ్చి గొంగళ్ల కూర్చొని ఎంటికలు ఏరుకున్నట్టు కుటుంబ పాలన గురించి మాట్లాడుతున్నరు. సోనియాగాంధీ, రాహుల్గాంధీ, ప్రియాంక గాంధీ ఒకే వేదికపై ఉండొచ్చు గానీ.. కేసీఆర్ది కుటుంబ పాలన అంటున్నరు. రూ.80 వేల కోట్ల ప్రాజెక్టులో లక్ష కోట్ల అవినీతి ఎట్ల జరుగుతది.
కొంచెం బుర్రాబుద్ధి ఉంటే ప్రాజెక్టు ఖర్చు కన్నా ఎక్కువ అవినీతి చేసిన్రని అంటరా.. రాహుల్గాంధీ తెల్ల కాగితం.. ఆయనకు ఏం తెల్వది.. రాసిచ్చినది చదువుతడు.. కేసీఆర్ ది అవినీతి పాలన అంటడు.. రాహుల్గాంధీ పక్కకు ఎవడున్నడు రేవంత్రెడ్డి.. అంతకంటే పెద్ద గజదొంగ దేశంలో ఎవరన్నా ఉన్నరా.. ఆయనకంటే దావూద్ఇబ్రహీం, చార్లెస్శోభరాజ్కూడా చిన్నోళ్లు.. ఆనాడు ఓటుకు నోటు.. ఈనాడు సీటుకు రేటు.. రేపు రాష్ట్రమంతా టోకున అమ్ముతడు.. కాంగ్రెస్ను బీజేపీకి అమ్మిపారేస్తడు.. గసోంటోన్ని పక్కన కూసోబెట్టుకొని రాహుల్గాంధీ మాట్లాడుతున్నడు” అని ఫైర్ అయ్యారు.
కాంగ్రెస్ అంటేనే చోర్ టీమ్..
కాంగ్రెస్అంటేనే చోర్టీమ్అని కేటీఆర్ విమర్శించారు. ‘‘రేవంత్ రెడ్డి ఒక 420. ఆయనకన్నా అవినీతి పరుడు ఎవరూ లేరు. ఓటుకు నోటు కేసులో దొరికిన దొంగ రేవంత్. దేశంలో ఆకాశం నుంచి భూమి లోపలి దాకా ఏ టూ జెడ్కుంభకోణాలు చేసిందే కాంగ్రెస్పార్టీ. ఒక్క చాన్స్ ఇవ్వాలని అడగడానికి వాళ్లకు సిగ్గుండాలి. 11 సార్లు ఆ పార్టీకి చాన్స్ఇస్తే మంచినీళ్లు కూడా ఇవ్వలేదు. ఫ్లోరోసిస్తో అల్లాడుతున్న నల్గొండకు ఆ పార్టీ చేసిందేమీ లేదు. కాంగ్రెస్ప్రభుత్వ నిర్లక్ష్యంతో ఒక్క నల్గొండ జిల్లాలోనే లక్ష మందికి పైగా ఫ్లోరోసిస్తో వికలాంగులయ్యారు. అలాంటి పార్టీ ఇప్పుడు ఒక్క చాన్స్అడుగుతోంది. ఆ పార్టీని ఎక్కడికక్కడ నిలదీయాలి. పైన కేసీఆర్.. కింద సంక్షేమ పథకాలు అందుతున్న ప్రజలు హ్యాపీగానే ఉన్నారు.
సీట్లు, పదవులు రాలేదన్న కోపంతో ఉన్న ఖద్దరు చొక్కాలోల్లు మాత్రమే ఖుషీగా లేరని ఇటీవల సిరిసిల్లలో ఓ పెద్ద మనిషి నాతో అన్నారు” అని చెప్పారు. ‘‘ఇచ్చిన హామీలను నెరవేర్చే కేసీఆర్ ఒకవైపుఉంటే.. ఓటుకు నోటు దొంగ, తెలంగాణ కోసం రాజీనామా చేయమంటే అమెరికాకు పారిపోయిన లీడర్లు మరొకవైపు ఉన్నారు. ఈ ఆకు సిపాయిలా కేసీఆర్తో పోటీ పడేది” అని ప్రశ్నించారు. సమావేశంలో దివ్యాంగుల కార్పొరేషన్చైర్మన్ వాసుదేవరెడ్డి, ఎమ్మెల్యేలు సుధీర్రెడ్డి, ముత్తిరెడ్డి యాదగిరి రెడ్డి, బాజిరెడ్డి గోవర్ధన్, నాయకులు మంద జగన్నాథం, కర్నె ప్రభాకర్, శ్రీనివాస్రెడ్డి తదితరులు పాల్గొన్నారు.
నియోజకవర్గానికో దివ్యాంగుల భవన్..
బీఆర్ఎస్ను మళ్లీ గెలిపిస్తే నియోజకవర్గానికి, జిల్లాకు ఒక దివ్యాంగుల భవన్ నిర్మిస్తామని కేటీఆర్ హామీ ఇచ్చారు. ‘‘దివ్యాంగుల కోసం తొమ్మిదిన్నరేండ్లలో రూ.10,300 కోట్లు ఖర్చు చేశాం. 2.25 లక్షల మందికి ట్రై స్కూటర్లు, ఇతర వాహనాలు అందజేశాం. దివ్యాంగుల రిజర్వేషన్లను 3 నుంచి 5 శాతానికి పెంచాం. దేశంలోనే దివ్యాంగులకు అత్యధిక పెన్షన్ఇస్తున్న ఏకైక రాష్ట్రం తెలంగాణ మాత్రమే. బీజేపీ, కాంగ్రెస్పాలిత రాష్ట్రాల్లో వందల్లోనే పింఛన్ఇస్తున్నారు. అలాంటి పార్టీలు వచ్చి అబద్ధపు మాటలతో మోసం చేయాలని చూస్తున్నాయి. పనులు చేయకుండా డైలాగులు కొడితేనే ఓట్లు పడతాయా?” అని ప్రశ్నించారు.
