- సీఎంను విమర్శించే స్థాయి కేటీఆర్కు లేదు : సీతక్క
- అసెంబ్లీకి రాని కేసీఆర్కు ఎమ్మెల్యే పదవెందుకని ఫైర్
- మహబూబాబాద్ జిల్లాలో గృహజ్యోతి స్కీమ్ ప్రారంభం
కొత్తగూడ, వెలుగు : సీఎం రేవంత్ రెడ్డిని విమర్శించే స్థాయి కేటీఆర్కు లేదని మంత్రి సీతక్క అన్నారు. తన స్థాయిని పెంచుకునేందుకే రేవంత్రెడ్డితో కంపేర్చేసుకుంటున్నారని ఆమె విమర్శించారు. బీఆర్ఎస్అధికారంలో ఉన్నప్పుడు తాను మంత్రినని విర్రవీగారని, అందుకే ప్రజలు కింద కూసోబెట్టిన్రని ఆమె ఎద్దేవా చేశారు. దురహంకారంతోనే సీఎం రాజీనామా చేయాలని అంటున్నారని ఫైర్ అయ్యారు. ప్రజలే రేవంత్కు సీఎం పదవి ఇచ్చారని ఆమె పేర్కొన్నారు.
శుక్రవారం ఆమె మహబూబాబాద్ జిల్లా కొత్తగూడ, గంగారం మండలాల్లో పర్యటించి పలు అభివృద్ధి పనులకు శంకుస్థాపన చేశారు. బావురుగొండలో గృహజ్యోతి పథకాన్ని ప్రారంభించి వినియోగదారులకు జీరో బిల్ అందజేశారు. అనంతరం ఆమె మీడియాతో మాట్లాడారు. గత బీఆర్ఎస్ సర్కారుపాలన అంతా అవినీతిమయమని ఆరోపించారు. మొదటి విడత ఎన్నికల్లో ఇచ్చిన హామీలనే నెరవేర్చని బీఆర్ఎస్ పార్టీ.. 7 లక్షల కోట్ల అప్పులు మిగిల్చిపోయిందని
వాటికి ఏటా 70 వేల కోట్లు వడ్డీ కట్టాల్సివస్తున్నదన్నారు. ‘‘ఇలాంటి పరిస్థితుల్లో 75 రోజులు కూడా పూర్తి కాని కాంగ్రెస్ పాలనను విమర్శించడం వాళ్లకు కరెక్ట్కాదు. విమర్శలు సద్వివిమర్శలుగా ఉండాలే కాని ఇష్టం వచ్చినట్టు మాట్లాడొద్దు” అని ఆమె సూచించారు. కాంగ్రెస్ ప్రజాపాలనలో ప్రజలకు ఇచ్చిన హామీలన్నీ అమలు చేస్తామని అన్నారు. అసెంబ్లీకి రాని కేసీఆర్ కు ఎమ్మెల్యే పదవి ఎందుకని ఆమె ప్రశ్నించారు. ఫారెస్ట్ నిభందనలతో ఏజెన్సీలో అభివృద్ధి పనులు జరగడం లేదని
కేంద్ర ప్రభుత్వం ఫారెస్ట్ చట్టాలను సవరించాలని డిమాండ్ చేశారు. ఇలాంటి సమస్యల పరిష్కారం కోసం కేంద్రంలోనూ కాంగ్రెస్ ప్రభుత్వాన్ని తీసుకు రావాలని కోరారు. సాయంత్రం కొత్తగూడలోని రైతు వేదికలో జిల్లా, మండల స్థాయి ఆఫీసర్లతో మంత్రి రివ్యూ నిర్వహించారు. రెండు మండలాల్లో తాగునీటి ఎద్దడి లేకుండా చూడాలని మిషన్ భగీరథ ఆఫీసర్లను ఆదేశించారు.