- మంత్రి సీతక్క చెంచు మహిళకు పరామర్శ
పంజగుట్ట, వెలుగు : నాగర్కర్నూల్ జిల్లాలో చెంచు మహిళ ఈశ్వరమ్మపై దాడిచేసి హింసించిన మానవ మృగాలు ఎంతటి వారైనా, ఎలాంటి వారైనా వదిలేది లేదని, కఠినంగా శిక్షిస్తామని రాష్ట్ర పంచాయతీ రాజ్ శాఖ మంత్రి దనసరి అనసూయ(సీతక్క) అన్నారు. కొద్ది రోజులుగా హైదరాబాద్ నిమ్స్ దవాఖానలో చికిత్స పొందుతున్న నాగర్కర్నూల్ జిల్లా కొల్లాపూర్ నియోజకవర్గంలోని మూల చింతలపల్లికి చెందిన చెంచుమహిళ ఈశ్వరమ్మను మంత్రి బుధవారం పరామర్శించారు. ఈ సందర్భంగా మంత్రి మాట్లాడుతూ బాధిత మహిళ కుటుంబానికి సంపూర్ణ రక్షణ కల్పిస్తామని, ఈ విషయంలో ఇప్పటికే పోలీసులకు ఆదేశాలు జారీ చేశామన్నారు.
ఐటీడీఏ, ఎస్సీ, ఎస్టీ శాఖల నుంచి రూ. 4 లక్షల ఆర్థిక సాయం ప్రకటించామన్నారు. దీంతో పాటు ఉమెన్ అండ్ చైల్డ్వెల్ఫేర్ నుంచి రూ.25 వేల చెక్కును ఈశ్వరమ్మ కుటుంబసభ్యులకు అందజేశారు. బాధితురాలు పూర్తిగా కోలుకునే వరకు ప్రభుత్వమే ఖర్చు భరిస్తుందని, దానికి తగిన చర్యలు తీసుకోవాలని నిమ్స్ డైరెక్టర్ ఎన్.బీరప్పను ఆదేశించారు. తన మామ నాగయ్య అనుమానస్పదంగా చనిపోయాడని ఈశ్వరమ్మ మంత్రికి చెప్పడంతో సమగ్ర విచారణ జరపాలని ఆదేశించారు. దీంతో పోలీసులు రంగంలోకి దిగి కొల్లాపూర్ పరిధిలో ఖననం చేసిన శవాన్ని బయటకు తీసి రీ పోస్ట్మార్టం నిర్వహించారు.
