- యూరియా సరఫరాలో రాష్ట్ర ప్రభుత్వ కృషి ఫలిస్తున్నది: మంత్రి తుమ్మల
- కేంద్ర ఎరువులు, రసాయనాల శాఖ ఉత్తర్వులు
- మరో 5 ఓడల నుంచి తెలంగాణకు కేటాయింపులు
- ఈ నెలలో ఇప్పటి వరకు 1.4 లక్షల టన్నులు సప్లై
- రాష్ట్రంలో తీరనున్న రైతుల యూరియా కష్టాలు
న్యూఢిల్లీ, వెలుగు: కేంద్రం నుంచి యూరియా సాధించడంలో రాష్ట్ర ప్రభుత్వ కృషి ఫలించింది. కాంగ్రెస్ ప్రభుత్వ ఒత్తిడితో రాష్ట్ర రైతుల యూరియా అవసరాలు తీర్చేలా ఈ వారంలో మొత్తం 80వేల టన్నులు కేంద్ర ప్రభుత్వం సరఫరా చేయనుంది. ఇందుకు అవసరమైన ఉత్తర్వులను కేంద్ర రసాయనాలు, ఎరువుల శాఖ విడుదల చేసిందని రాష్ట్ర వ్యవసాయ శాఖ మంత్రి తుమ్మల నాగేశ్వరరావు తెలిపారు. రాష్ట్రానికి యూరియా సరఫరాపై చర్చించేందుకు తుమ్మల సోమవారం ఢిల్లీ వెళ్లి కేంద్ర ఎరువుల శాఖ కార్యదర్శి రజత్ కుమార్ మిశ్రాతో సమావేశమయ్యారు. తెలంగాణ రైతులకు సరిపడా యూరియాను ఈ పది రోజుల్లోనే సరఫరా చేయాలని.. మిశ్రాను కోరారు. వీలైనంత త్వరగా కేటాయించి, పంపిణీ అయ్యేలా చూడాలన్నారు. సమావేశం అనంతరం తుమ్మల మాట్లాడుతూ తమ విజ్ఞప్తితో రాష్ట్రానికి యూరియా సరఫరాకు కేంద్రం అంగీకరించిందని వివరించారు.
అలాగే అదనంగా మరో 5 ఓడల నుంచి తెలంగాణకు యూరియా కేటాయిస్తామని కేంద్ర ఎరువుల శాఖ కార్యదర్శి హామీ ఇచ్చారని తెలిపారు. దీంతో రాష్ట్రంలో రైతుల యూరియా కష్టాలు తీరుతాయని ఆశాభావం వ్యక్తం చేశారు. ‘‘ప్రస్తుతం తెలంగాణలో సాగులో ఉన్న ప్రధాన పంటలు.. వరి, మొక్కజొన్న, పత్తికి యూరియా ఎంతో అవసరం. ఈ పది, పదిహేను రోజులు పంటలకు అత్యంత కీలకమైనందున.. రైతుల అవసరాలకు తగ్గట్టుగా యూరియా సరఫరా చేయాలని కోరాం. అలాగే అంతకు ముందు నెలలకు సంబంధించిన యూరియా లోటును కూడా పూడ్చే విధంగా ఈ నెలలో మొత్తం 2 లక్షల టన్నులు కావాలని కోరాం. అయితే ఈ నెలలో ఇప్పటి వరకు లక్షా 4 వేల టన్నుల యూరియా సరఫరా చేశారు. రానున్న 10 రోజుల్లో మరో లక్ష టన్నుల యూరియాను సరఫరా చేయాలని కోరగా.. దేశీయ యూరియా ఉత్పత్తి ఆశించిన స్థాయిలో లేని నేపథ్యంలో.. విదేశాల నుంచి దిగుమతయ్యే యూరియా సప్లైలో తెలంగాణకు అధిక ప్రాధాన్యత ఇస్తామంటూ రజత్ కుమార్ మిశ్రా తెలిపారు అదనంగా 40 వేల టన్నుల యూరియాను తెలంగాణకు కేటాయిస్తూ ఉత్తర్వులు జారీ చేశారు. గతంలో ఇచ్చిన ప్రణాళిక ప్రకారం ఈ వారంలో సరఫరా అయ్యే 40 వేల టన్నులకు ఇది అదనం’’ అని తుమ్మల వెల్లడించారు.
రాష్ట్రానికి వచ్చిన యూరియా వివరాలు..
మంగళూరు, ఎంవీ రెక్ గ్రేస్ 2,700
కాకినాడ, ఎంవీ జీఎన్ రూబి 8,100
కాకినాడ, ఎంవీ గ్రేస్ హార్మోనీ 7,800
కృష్ణపట్నం, ఎంవీ ఎన్డీవర్ 13,000
జైగఢ్, ఎంవీ వాడి అల్బోస్టాన్ 8,100
