గ్రేటర్ వరంగల్/ జనగామ అర్బన్, వెలుగు: ధాన్యం కొనుగోలు నిర్వహణ సజావుగా జరగాలని మంత్రులు ఉత్తమ్ కుమార్రెడ్డి, తుమ్మల నాగేశ్వరరావు సూచించారు. ధాన్యం విక్రయించిన 48 గంటల్లో రైతుల ఖాతాల్లో డబ్బులు జమచేయాలని, రాష్ర్ట ప్రభుత్వం అందజేస్తున్న సన్న రకానికి అదనంగా రూ.500 బోనస్వర్తింపజేయాలని అన్నారు. బుధవారం వారు ఆయా జిల్లాల కలెక్టర్లతో ధాన్యం సేకరణ ప్రక్రియపై వీడియో కాన్ఫరెన్స్ నిర్వహించారు.
ఈ సందర్భంగా పలు సూచనలు చేశారు. కార్యక్రమంలో కలెక్టరేట్ నుంచి పాల్గొన్న వరంగల్ కలెక్టర్ సత్యశారద మాట్లాడుతూ జిల్లాలో 258 ధాన్యం కొనుగోలు కేంద్రాలను ఏర్పాటు చేశామని, ఆయా కేంద్రాల వద్ద అన్ని ఏర్పాట్లు చేశామని చెప్పారు. వానాకాలానికి సంబంధించి 3.15 లక్షల మెట్రిక్ టన్నుల దిగుబడి వస్తుందని అంచనా వేస్తున్నామని, జిల్లాకు 1200 అదనపు టార్ఫాలిన్లు కేటాయించాలని మంత్రులను కోరారు. జనగామ నుంచి పాల్గొన్న కలెక్టర్ రిజ్వాన్ భాషా షేక్అనంతరం జిల్లా అధికారులతో సమీక్ష నిర్వహించారు. జిల్లాలో పూర్తిస్థాయిలో కొనుగోలు కేంద్రాలను ప్రారంభించాలని ఆదేశించారు.
