హైదరాబాద్, వెలుగు: ఇంటర్ ఆన్సర్ షీట్ల వ్యాల్యుయేషన్లో తప్పుల నివారణకు చర్యలు తీసుకుంటున్నామని అధికారులు చెప్తున్నా, లోపాలు మాత్రం తగ్గడం లేదు. శుక్రవారం రీవ్యాల్యుయేషన్, రీకౌంటింగ్ రిజల్ట్ ను ఇంటర్ బోర్డు రిలీజ్ చేయడంతో తప్పులు ఒక్కొక్కటిగా బయటపడుతున్నాయి. ఫస్టియర్ ఎకనామిక్స్ లో ఓ విద్యార్థికి జీరో మార్కులు రాగా, రీవ్యాల్యుయేషన్ లో44 మార్కులొచ్చాయి. తాజాగా ఇంగ్లిష్లో 57 మార్కులు రాగా, రీవ్యాల్యుయేషన్లో 92 మార్కులు వచ్చాయి. అర్హత లేని లెక్చరర్లతో వ్యాల్యుయేషన్ చేయించడంతో పాటు సిబ్బంది నిర్లక్ష్యంతో ఇలాంటి పొరపాట్లు జరుగుతున్నాయి. లెక్చరర్లు, అధికారులు, సిబ్బంది తప్పిదాలతో స్టూడెంట్లకు తిప్పలు తప్పడం లేదు.
రీవ్యాల్యుయేషన్లో ఇలా..
రంగారెడ్డి జిల్లాకు చెందిన సిద్ధేశ్వర్ రెడ్డి అనే ఫస్టియర్ స్టూడెంట్కు ఎంపీసీలో 426 మార్కులొచ్చాయి. మ్యాథ్స్ ఏ, బీ పేపర్లలో, ఫిజిక్స్, కెమిస్ర్టీలో బైకి బై వచ్చాయి. సంస్కృతంలో 99 రాగా, ఇంగ్లిష్ లో మాత్రం 57 మార్కులొచ్చాయి. దీంతో రీవ్యాల్యుయేషన్కు అప్లై చేసుకోగా 92 మార్కులు వచ్చాయి. ఏకంగా 35 మార్కులు స్కోర్ అయ్యాయి. ఖమ్మం జిల్లాకు చెందిన గోపి అనే హెచ్ఈసీ విద్యార్థికి సెకండియర్ ఎకానామిక్స్లో 0 మార్కులు వేశారు. అన్ని సబ్జెక్టుల్లో మంచి మార్కులు వచ్చి, ఈ ఒక్క సబ్జెక్టులో తక్కువ రావడంపై పేపర్లలో వార్తలు వచ్చాయి. ఆ తర్వాత గోపి రీవ్యాల్యుయేషన్ చేయించగా.. 44 మార్కులు రావడంతో అతను పాస్ అయ్యాడని కొత్త మెమోను వెబ్సైట్లో పెట్టారు. రీవ్యాల్యుయేషన్లో ఇలా చాలామందికి 5–10 మార్కులు కలిసినట్టు లెక్చరర్లు, స్టూడెంట్లు చెబుతున్నారు. ఇలాంటి ఘటనలు ఏటా జరుగుతున్నా, ఇంటర్ బోర్డు మాత్రం మాములుగానే తీసుకుంటోంది.
