దుబ్బాక, వెలుగు: వృద్దులు, వింతువులు, వికలాంగులకు పింఛన్లు రావాలంటే బీఆర్ఎస్ ప్రభుత్వం పోవాలని ఎమ్మెల్యే రఘునందన్రావు అన్నారు. శనివారం మండలంలోని పెద్దగుండవెళ్లి, మిరుదొడ్డి మండలం ధర్మారం, ఆరెపల్లి, లక్ష్మి నగర్ గ్రామాల్లో ఇంటింటి ప్రచారం నిర్వహించారు. ఈ సందర్భంగా ఆయన మాట్లాడుతూ.. తెలంగాణ వస్తే పేదలు, నిరుద్యోగుల జీవితాల్లో వెలుగులు వస్తాయని అందరూ ఆశించారు కానీ ఒక్క కేసీఆర్ కుటుంబంలోనే వెలుగులు నిండాయని ఆరోపించారు.
బీఆర్ఎస్కు ఓటేయ్యకుంటే పింఛన్లు, డబుల్ బెడ్రూమ్లు రావని నాయకులు బెదిరిస్తున్నారని, ఇలాంటి ఊకదంపుడు మాటలకు ఎవ్వరూ భయపడొద్దన్నారు. గ్రామాల్లో దళిత, బీసీ బంధు కేవలం బీఆర్ఎస్ లీడర్లకే వచ్చాయని మిగతావాళ్లకు ఎందుకివ్వరో నిలదీయాలని ఎమ్మెల్యే కోరారు. నియోజకవర్గంపై మంత్రి హరీశ్రావు సవతి తల్లి ప్రేమ చూపిస్తున్నారని విమర్శించారు. 17 శాతం ఉన్న మాదిగ సామాజిక వర్గానికి ఒక్క మంత్రి పదవి ఇవ్వలేని దద్దమ్మ సీఎం కేసీఆర్అన్నారు.
తాను గెలవగానే రాష్ట్ర అసెంబ్లీలో రేషన్ కార్డు, ఆసరా పింఛన్ల కోసం కోట్లాడి దుబ్బాక ప్రతిష్టను పెంచానని పేర్కొన్నారు. మిరుదొడ్డి మండలం ధర్మారం నుంచి దుంపలపల్లి మీదుగా బల్వంతాపూర్ వరకు రూ.4 కోట్ల కేంద్ర నిధులతో తారు రోడ్డు వేయించానని చెప్పారు. మరొక్కసారి గెలిపిస్తే మరింత అభివృద్ధి చేస్తానని హామీ ఇచ్చారు.
