టీమిండియా ఫాస్ట్ బౌలర్ మహమ్మద్ సిరాజ్ ను ఐసీసీ అవార్డు వరించింది. ఈ హైదరాబాద్ ఫాస్ట్ బౌలర్ అంతర్జాతీయ వేదికపై సత్తా చాటి 2025 ఆగస్టు నెలకు గానూ ఐసీసీ ప్లేయర్ ఆఫ్ ది మంత్ అవార్డు గెలుచుకున్నాడు. ఆగస్టు లో ఇంగ్లాండ్ తో ముగిసిన చివరి టెస్టులో సిరాజ్ చేసిన ప్రదర్శనకు గాను ఈ అవార్డు దక్కింది. ఈ అవార్డు కోసం నామినీలుగా ఎంపికైన వెస్టిండీస్ ఫాస్ట్ బౌలర్ జేడెన్ సీల్స్.. న్యూజిలాండ్ పేసర్ మాట్ హెన్రీలను ఓడించి సిరాజ్ సోమవారం (సెప్టెంబర్ 15) ఈ అవార్డును గెలుచుకున్నాడు. ఆగస్టు నెలలో సిరాజ్ ఒక్క టెస్ట్ మాత్రమే ఆడడం విశేషం.
అవార్డు గెలుచుకున్న తర్వాత సిరాజ్ మాట్లాడుతూ ఇలా అన్నాడు.. "ఐసీసీ ప్లేయర్ ఆఫ్ ది మంత్ గా ఎంపికవడం ఒక ప్రత్యేక గౌరవం. ఆండర్సన్-టెండూల్కర్ ట్రోఫీ ఒక చిరస్మరణీయ సిరీస్. నేను పాల్గొన్న అత్యంత తీవ్రమైన పోటీలలో ఇది ఒకటి. ముఖ్యంగా మ్యాచ్ ను నిర్ణయించే పరిస్థితుల్లో నా స్పెల్ జట్టుకు ఉపయోగపడినందుకు గర్వపడుతున్నాను. ఇంగ్లాండ్ గడ్డపై బౌలింగ్ చేయడం సవాలుతో కూడుకున్నది. ఈ సిరీస్ నాలోని అత్యుత్తమ ఆటను బయటకు తీసుకొని వచ్చింది. ఈ అవార్డు నాలాగే నా సహచరులకు, నా సహాయక సిబ్బందికి కూడా చెందుతుంది". అని ఈ హైదరాబాదీ పేసర్ అన్నాడు.
ఓవల్ టెస్టులో సిరాజ్ మ్యాజిక్
ఓవల్ టెస్టులో టీమిండియా విజయం సాధించడంలో హైదరాబాదీ పేసర్ మహ్మద్ సిరాజ్ కీలక పాత్ర పోషించాడు. ఐదో టెస్ట్ సెకండ్ ఇన్సింగ్స్లో ఐదు వికెట్లతో చెలరేగి భారత్కు చారిత్రాత్మక విజయాన్ని అందించాడు. తొలి ఇన్నింగ్స్ లో నాలుగు వికెట్లు పడగొట్టి ఇంగ్లాండ్ కు భారీ ఆధిక్యం దక్కకుండా చేశాడు. ఓవరాల్ గా ఈ టెస్టులో రెండు ఇన్నింగ్స్ ల్లో కలిపి 9 వికెట్లు తీసుకున్న సిరాజ్ కు ప్లేయర్ ఆఫ్ ది మ్యాచ్ అవార్డు లభించింది. సిరాజ్ అద్భుత స్పెల్ తో ఇంగ్లాండ్ తో సిరీస్ ను ఇండియా 2-2 తేడాతో సిరీస్ ను సమం చేసింది. ఈ సిరీస్ లో సిరాజ్ మొత్తం 23 వికెట్లతో అత్యధిక వికెట్లు తీసుకున్న బౌలర్ గానిలిచాడు.
ఓర్లా ప్రెండర్‌గాస్ట్ కు మహిళా ప్లేయర్ ఆఫ్ ది మంత్ అవార్డు:
మహిళల విభాగంలో ఐర్లాండ్ ఆల్ రౌండర్ ఓర్లా ప్రెండర్‌గాస్ట్ 2025 ఆగస్టు నెలకు గానూ ఐసీసీ ప్లేయర్ ఆఫ్ ది మంత్ అవార్డు గెలుచుకుంది. పాకిస్తాన్ వికెట్ కీపర్-బ్యాటర్ మునీబా అలీ, నెదర్లాండ్స్‌ ప్లేయర్ ఐరిస్ జ్విల్లింగ్‌లను ఓడించి ఈ అవార్డును గెలుచుకుంది. "ఈ అవార్డు అందుకున్నందుకు నేను సంతోషంగా ఉన్నాను. ఐసీసీకి.. నాకు ఓటు వేసిన ప్రతి ఒక్కరికీ నా కృతజ్ఞతలు తెలియజేస్తున్నాను. మా సహాయక సిబ్బందిని కూడా నేను అభినందిస్తున్నాను". అని ప్రెండర్‌గాస్ట్ అవార్డు గెలుచుకున్న తర్వాత చెప్పుకొచ్చింది.
He played a pivotal role in #TeamIndia's memorable performances during the tour of England recently! 👌👌
— BCCI (@BCCI) September 15, 2025
Say hello 👋 to the ICC Men's Player of the Month for August 2025! 🔝
Congratulations, Mohammed Siraj 👏👏@mdsirajofficial pic.twitter.com/Iach0IDK3w
