మలయాళ సినీ ఇండస్ట్రీ మరో సారి మోహన్ లాల్ యుగంగా మారిపోయింది. దీనికి కారణం మరేదో కాదు, జీతూ జోసెఫ్ రచించి, దర్శకత్వం వహించిన 'దృశ్యం 3' చిత్రం. ఈ మూవీ షూటింగ్ పూర్తి కాకముందే రికార్డులు సృష్టిస్తోంది. ఈ విషయాన్ని నిర్మాత ఎం. రంజిత్ ఓఈవెంట్లో అధికారికంగా వెల్లడించారు. 'దృశ్యం 3' చిత్రం ప్రీ-బిజినెస్ ద్వారా ఇప్పటికే రూ.350 కోట్లు ఆర్జించిందని తెలిపారు. ఇది మలయాళ చిత్రాలలో ఇప్పటివరకు నమోదైన అత్యధిక వ్యాపారం అని ఆయన ప్రకటించారు.
షూటింగ్ లో ఉండగానే సరికొత్త రికార్డు
నిర్మాణ దశలో ఉన్న ఏ భారతీయ ప్రాంతీయ భాషా చిత్రం కూడా ఇంత పెద్ద మొత్తంలో ఆదాయాన్ని సంపాదించలేదని ఎం. రంజిత్ నొక్కి చెప్పారు. దీనికి ముందు రికార్డులు సృష్టించిన మలయాళ బ్లాక్బస్టర్ల మొత్తం థియేట్రికల్ రన్ కలెక్షన్లు సైతం, 'దృశ్యం 3' షూటింగ్ పూర్తి కాకముందే సాధించిందని వెల్లడించారు. మరో వైపు 'దృశ్యం' ఫ్రాంచైజీ మలయాళ సినిమా చరిత్రలోనే అతిపెద్ద కమర్షియల్ ఎంటర్టైనర్గా తన స్థానాన్ని పదిలం చేసుకుంది. మోహన్లాల్ పోషించిన 'జార్జ్కుట్టి' పాత్ర, నేటికీ భారతీయ సినీ చరిత్రలో అత్యంత ఐకానిక్ పాత్రలలో ఒకటిగా నిలిచింది. ఈ విజయం మలయాళ చిత్ర పరిశ్రమకు ఒక మైలురాయిగా మారింది.
మోహన్లాల్ రికార్డుల పరంపర..
మలయాళ చిత్రసీమలోరూ.100 కోట్ల మార్కును తొలిసారిగా దాటిన చిత్రం కూడా మోహన్లాల్ నటించిన 'పులిమురుగన్' కావడం గమనార్హం. మోహన్లాల్ యొక్క శక్తివంతమైన స్టార్డమ్, జీతూ జోసెఫ్ యొక్క కట్టుదిట్టమైన స్క్రీన్ప్లేతో కలవడం వల్లనే 'దృశ్యం 3' కు అంచనాలు పెరిగాయి. 'దృశ్యం 3' చిత్రం మలయాళం , హిందీ, తమిళం, తెలుగు భాషల్లో విడుదలకు సిద్ధమవుతోంది. ఇది రూ 350 కోట్ల ప్రీ-బిజినెస్ అంకెలో ఒక పెద్ద భాగమని విశ్లేషకులు భావిస్తున్నారు.
జీతూ జోసెఫ్ గత చిత్రం - ఒక పాఠం
'దృశ్యం 3' పై ఇంతటి అంచనాలు ఉన్నప్పటికీ, దర్శకుడు జీతూ జోసెఫ్ యొక్క గత చిత్రం 'మిరాజ్' (Mirage) ప్రేక్షకులను పెద్దగా ఆకట్టుకోలేకపోయింది. అయినప్పటికీ, 'దృశ్యం' ఫ్రాంచైజీపై ఉన్న నమ్మకం, ముఖ్యంగా జార్జ్కుట్టి కథ ముగింపు ఎలా ఉంటుందనే ఆసక్తి, ఈ చిత్రం యొక్క వ్యాపారాన్ని ఏమాత్రం ప్రభావితం చేయలేదు .ప్రస్తుతానికి, 'దృశ్యం 3' తో మలయాళ సినిమా బాక్సాఫీస్ సరిహద్దులు ఎక్కడిదాకా విస్తరిస్తాయో చూడటానికి దేశీయ, అంతర్జాతీయ సినీ వర్గాలు ఆసక్తిగా ఎదురుచూస్తున్నాయి.
