- 21ఏళ్ల వయసులోనే ఆల్ రౌండ్ టాలెంట్
మల్టీ టాస్కింగ్ అంటే మహిళలకు నల్లేరు మీద నడక.. అందుకు బెస్ట్ ఎగ్జాంపుల్ ఇక్షా హంగ్మా. సిక్కింకు చెందిన ఈమె పోలీస్ అధికారిగా, మోడల్గా, బాక్సర్గా వేర్వేరు ఫీల్డ్స్లో పేరు తెచ్చుకుంది. ఇటీవల జరిగిన ఎంటీవీ సూపర్ మోడల్ సీజన్2లో పార్టిసిపేట్ చేసింది. 21 ఏండ్లలోనే ఇన్ని సాధించిన ఆమె గురించి...
ఇక్షాను ఇప్పుడు సిక్కిం సూపర్ విమెన్ అంటున్నారు. ఎందుకంటే ఆమె టాలెంట్ అలాంటిది మరి. పుట్టింది సిక్కింలోని రుంబాక్ అనే చిన్న ఊళ్లో. మిడిల్ క్లాస్ ఫ్యామిలీలో పుట్టిన ఆమె గొప్ప గొప్ప కలలు కన్నది. మోడల్ కావాలని చిన్నప్పుడు అనుకుంది. ఇండియాలోనే సూపర్ మోడల్ గా పేరు తెచ్చుకోవాలనేది ఆమె చిన్ననాటి కల. చిన్నప్పుడు ‘ఎంటీవీ’లో వచ్చే సూపర్ మోడల్ ఎపిసోడ్స్ను తెగ చూసేది. ఎప్పటికైనా తను కూడా అలా కనిపించాలని గట్టిగా కోరుకుంది. టీనేజ్లోకి అడుగుపెట్టాక ఫిట్నెస్ పై దృష్టి పెట్టింది. మోడల్ కావాలన్న డ్రీమ్ గురించి తండ్రితో చెప్పింది. తండ్రి కూడా ఎంకరేజ్ చేశాడు. ఫిట్నెస్ నుంచి ఇక్షా బాక్సింగ్ వైపు అడుగులు వేసింది. నేషనల్ లెవల్ బాక్సింగ్ పోటీల్లో పార్టిసిపేట్ చేసింది. కానీ, అంతలోనే సరైన ఆదాయం లేక ఇక్షా కుటుంబం ఇబ్బందులు పడింది. దాంతో కుటుంబ బాధ్యతల్ని కూడా తీసుకుంది ఇక్షా. డిగ్రీ తర్వాత ఉద్యోగం చేస్తూ కుటుంబానికి ఆసరాగా నిలవాలి అనుకుంది. అందుకని ఫిట్నెస్కు తగ్గట్టు పోలీస్ ఉద్యోగంలో చేరాలనుకుంది. డిగ్రీ అయిపోయిన కొద్ది రోజులకే సిక్కిం పోలీస్ ఫోర్స్లో జాబ్ తెచ్చుకుంది. 14 నెలల ట్రైనింగ్ తర్వాత పోలీస్గా బాధ్యతలు స్వీకరించింది. ఉద్యోగం మీద ప్రేమ, మరో వైపు మోడల్ కావాలన్న ప్యాషన్ను రెండింటినీ బ్యాలెన్స్ చేయగలిగింది. అంతేకాదు బాక్సర్గా కూడా రాణిస్తోంది. మోడలింగ్ కూడా చేస్తోంది. ఈమధ్యనే చిన్నప్పటి నుంచి తను కలలు కన్న ఎంటీవీ రియాల్టీ షోలో పాల్గొన్నది. ముంబైలో జరిగిన ‘సూపర్ మోడల్ సీజన్ 2’లో పార్టిసిపేట్ చేసి టాప్ 9 మోడల్గా సెలక్ట్ అయింది.
