నల్గొండ, వెలుగు: మునుగోడు ఉప ఎన్నికలో ముదిరాజ్ (తెనుగు) ఓట్లపై రాజకీయ పార్టీలు ఫోకస్ పెట్టాయి. నియోజకవర్గంలో 2.41 లక్షల మంది ఓటర్లు ఉండగా.. ఇందులో అత్యధికంగా 1.60 లక్షల మంది బీసీలే ఉన్నారు. దీంతో పార్టీలు బీసీ కులాల వారీగా లెక్కలు తీస్తున్నాయి. ప్రధానంగా టాప్ టెన్ కులాలపై ఫోకస్ చేశాయి. అందులోనూ 30 వేల నుంచి 35 వేల వరకు ఉన్న ముదిరాజ్ ఓటర్లు అన్ని పార్టీలకు కీలకంగా మారారు. నియోజకవర్గంలో బీసీలకే టికెట్ ఇవ్వాలని డిమాండ్ చేస్తున్న కులాల్లో ముదిరాజ్లు కూడా మొదటి నుంచీ తమ వాయిస్ గట్టిగానే వినిపిస్తున్నారు.
ముదిరాజ్ ఓట్లపై పార్టీల ఫోకస్
ఈ నేపథ్యంలో రాజకీయ పార్టీలు అదే సామాజిక వర్గానికి చెందిన ఎమ్మెల్యేలను, ముఖ్యనేతలను మునుగోడులో దింపి ప్రచారం చేస్తున్నాయి. బీసీల్లో ముదిరాజ్లే కీలకమని, తమ ఓట్లు పార్టీల గెలుపోటములను నిర్ణయించే స్థాయిలో ఉన్నాయని తెలంగాణ ముదిరాజ్ మహాసభ కామారెడ్డి జిల్లా అధ్యక్షుడు జి. విఠల్, ముదిరాజ్ సదర్ సంఘం కామారెడ్డి జిల్లా సెక్రటరీ చింతల నీలకంఠం, యాదాద్రి జిల్లా ముదిరాజ్ యువసేన నేతలు పేర్కొన్నారు. తెలంగాణ బీసీ సాధికారత కమిటీ సేకరించిన వివరాల ప్రకారం మునుగోడులో ఆయా సామాజిక వర్గాలవారీగా టాప్టెన్ ఓటర్లలో గౌడ్స్ (తెనుగు గౌడ్స్ తో కలిపి) – 35 వేల మంది, ముదిరాజ్ (తెనుగు) –34,050 మంది, మాదిగ – 25,650, యాదవ – 21,360, పద్మశాలి – 11,680, లంబాడీ/ఎరుకల –10,520, మాల – 10,350, వడ్డెర – 8,350, కుమ్మరి – 7,850, విశ్వబ్రాహ్మణ – 7,820 మంది ఓటర్లు ఉన్నట్లు వారు తెలిపారు.
