నల్గొండ, వెలుగు: గెలుపే లక్ష్యంగా కాంగ్రెస్ వినూత్న ప్రచారం చేస్తోంది. ఇదివరకే మహిళా ఓటర్లను ఆకట్టుకునేందుకు పాల్వాయి స్రవంతి మహిళలకు గాజులు తొడిగి, బొట్టు పెడుతూ ఓట్లడుగుతున్నారు. ఇదే క్రమంలో ఎన్ఎస్యూఐ విభాగం లక్ష మంది ఓటర్ల కాళ్లు మొక్కే కార్యక్రమం ఆదివారం చౌటుప్పుల్ మున్సిపాలిటీలో మొదలుపెట్టింది.
ఆరు మండలాలు, రెండు మున్సిపాలిటీల్లో కలిపి 8 వందల మంది ఎన్ఎస్యూఐ కార్యకర్తలు 40 వేల గడపలకు వెళ్లి లక్ష మంది ఓటర్ల కాళ్లు మొక్కనున్నారు. ఎన్ఎస్యూఐ స్టేట్ ప్రెసిడెంట్ బల్మూరి వెంకట్ ఆధ్వర్యంలో ఈ ప్రోగ్రామ్ నిర్వహిస్తున్నారు.
ప్రచారంలో భాగంగా పీసీసీ చీఫ్ రేవంత్ రెడ్డి నారాయణ్ పూర్ మండలంలో లక్ష మంది ఓటర్ల కాళ్లు మొక్కుతానని ప్రకటించిన సంగతి తెలిసిందే. ఇందులో భాగంగా ఆ బాధ్యతను ఎన్ఎస్యూఐ విభాగానికి అప్పగించారు. కార్యక్రమంలో పాల్గొనేందుకు సోమవారం పీసీసీ చీఫ్ రేవంత్ రెడ్డి నారాయణ్ పూర్, పుట్టపాకలో పర్యటించనున్నారు.
