హిందూ సాధువుకోసం ముస్లిం యువకుడి ప్రార్థనలు ఇప్పుడు సోషల్ మీడియాలో నెటిజన్ల హార్ట్ ను గెలుచుకున్నాయి. హిందూ ఆథ్యాత్మక గురువు ప్రేమానంద్ జీ మహారాజ్ఆరోగ్యం బాగుపడాలని ముస్లింలకు పవిత్ర నగరం అయిన మదీనాలో అలహాబాద్ ముస్లిం యువకుడు చేసిన ప్రార్థనలకు సంబంధించిన వీడియో వైరల్ అవుతోంది. వివరాల్లోకి వెళితే..
మూత్రపిండాల వ్యాధితో బాధపడుతున్న ప్రముఖ మత,హిందూ ఆధ్యాత్మిక గురువు ప్రేమానంద్ జీ మహారాజ్ శ్రేయస్సు కోసం ఒక ముస్లిం వ్యక్తి ప్రార్థిస్తున్నట్లు చూపించే వీడియో సోషల్ మీడియాలో వైరల్ అవుతోంది. ఇప్పుడు వైరల్ అవుతున్న ఈ వీడియో క్లిప్‌లో.. ప్రేమానంద్ జీ మహారాజ్ త్వరగా కోలుకోవాలని మంచి ఆరోగ్యం కోసం అలహాబాద్ కు చెందిన సూఫియాన్ మదీనాలో ప్రార్థనలు చేస్తూ కనిపించారు.ఇది అన్ని వర్గాల ప్రజలనుంచి ప్రశంసలు అందుకుంది. సూఫియాన్ ను అందరూ పొగడ్తలతో ముంచెత్తారు. ఇది మతపరమైన సరిహద్దులను చెరిపేసి సామరస్యం, కరుణను సూచిస్తుంది. భారత్ లో భిన్నత్వంలో ఏకత్వానికి ఇది ఒక ఉదాహరణ అంటున్నారు నెటిజన్లు.
ఒక నిమిషం 20 సెకన్ల నిడివి గల వీడియోలో.. బృందావనం సాధువు త్వరగా కోలుకోవాలంటూ ఇస్లాం పవిత్ర ప్రదేశాల్లో ఒకటైన మదీనాలో సూఫియాన్ ప్రార్థన చేస్తున్నట్లు కనిపించారు. వీడియోలో సుఫియాన్ తన ఫోన్ పట్టుకుని ప్రేమానంద్ జీ మహారాజ్ చిత్రం వైపు చూపిస్తూ సాంప్రదాయ ముస్లిం ప్రార్థన భంగిమలో చేతులు పైకెత్తి ప్రార్థనలు చేశాడు. ఓ అల్లాహ్ భారతదేశ గొప్ప సాధువు ప్రేమానంద్ మహారాజ్ ను త్వరగా ఆరోగ్యవంతుడిని చెయ్యి.. ఆయన తిరిగి భక్తులకు మార్గనిర్దేశం చేసేలా చెయ్యి అని ప్రార్థించనట్లు వీడియోలో వినిపిస్తోంది.
నేను గంగా యమునా సంగమం ప్రయాగ్ రాజ్ నుంచి వచ్చాను. ప్రేమానంద్ మహారాజ్ చాలా మంచి వ్యక్తి .. ఆయన అనారోగ్యంతో ఉన్నట్లు తెలిసింది. నేను ఇప్పుడు ఖిజ్రాలో ఉన్నాను. ప్రేమానంద్ మహారాజ్ కు ఆరోగ్యం ప్రసాదించాలని అల్లాహ్ను ప్రార్థిస్తున్నాను. అని సూఫియాన్ చెప్పడం వీడియోలో వినిపిస్తోంది. హిందూ,ముస్లిం అనేది పట్టింపు లేదు. మంచి,నిజమైన వ్యక్తిగా ఉండటం ముఖ్యం అని సూఫియాన్ చెప్పడం అందరిని ఆకట్టుకుంది.
రిపోర్టుల ప్రకారం.. ప్రేమానంద్ మహారాజ్ ఆటో సోమల్ డామినెంట్ పాలిసిస్టిక్ కిడ్నీ వ్యాధిలో బాధపడుతున్నారు. దీంతో ఆయన రెండు మూత్రపిండాలు చెడిపోయినట్లు తెలుస్తోంది. ప్రేమానంద్ మహారాజ్ కు ఉత్తరప్రదేశ్ లోని బృందావనంలో ఆశ్రమం ఉంది. ప్రేమానంద్ ఆధ్యాత్మిక ప్రసంగాలు భక్తులలో బాగా ప్రాచుర్యం పొందాయి.
నెటిజన్లు ఏమంటున్నారంటే..
సోషల్ మీడియాలో షేర్ చేయబడిన ఈ వీడియో ఇప్పటికే వేల సంఖ్యలో నెటిజన్లు చూశారు. అంతే రేంజ్ లో చేస్తున్నారు. సూఫియాన్ చర్య స్ఫూర్తిదాయం.. ప్రపంచానికి ప్రస్తుతం అవసరమైన మేసేజ్ అని పొగడ్తలతో ముంచెత్తారు. ఈ వీడియో మాకు మానవత్వానికి నిజమైన అర్థాన్ని నేర్పిందని ఓ నెటిజన్ చెప్పడం ఆ వీడియో ఎంతగా ఆకట్టుకుందో తెలుస్తోంది.
డాక్టర్ అబ్దుల్ కలాం సర్ లాగానే చెప్పారు అని ఒక నెటిజన్ చెప్పగా.. నాకు ఇలాంటి భారత దేశం కావాలి మరో నెటిజన్రాశారు.
అమీన్.. మన మాతృభూమిలో శాంతి , సోదరభావం, సామరస్యం నెలకొనాలి.. జై భారత్.. అని మరో నెటిజన్రిప్లై ఇచ్చారు.
ప్రేమానంద్కు కిడ్నీ ఇచ్చేందుకు ముందుకొచ్చిన ముస్లిం దాత..
గతంలో జబ్బున పడ్డప్పుడు ప్రేమానంద్ మహారాజ్ కు కిడ్నీ ఇచ్చేందుకు ఓ ముస్లిం డోనర్ముందుకొచ్చాడు. హిందూ ముస్లిం ఐక్యతకు చిహ్నంగా అరిఫ్ ఖాన్ అనే 26ఏళ్ల యువకుడు కిడ్నీ దానం చేస్తానంటూ ప్రేమానంద్ మహారాజ్ కు లేఖ రాశారు. మధ్యప్రదేశ్‌లోని నర్మదాపురం జిల్లాలోని ఇటార్సి పట్టణంలోని న్యాస్ కాలనీ నివాసి అరిఫ్ ఖాన్.. కలెక్టర్ సోనియా మీనా కార్యాలయం ద్వారా హిందూ సాధువుకు లేఖను పంపారు. నేను బతికి ఉన్నా లేకపోయినా.. మీ జీవితం ఈ ప్రపంచానికి చాలా విలువైనదంటూ అరిఫ్ ఖాన్ లేఖలో రాయడం విశేషం.
