- నిర్లక్ష్యం వల్లే చనిపోయాడని డాక్టర్లను నిలదీసిన కుటుంబ సభ్యులు
- సర్ది చెప్పిన పోలీసులు
- ఎస్పీకి ఐఎంఏ ఆధ్వర్యంలో ఫిర్యాదు
నల్గొండ అర్బన్‌, వెలుగు : అనారోగ్యంతో ఉన్న తమ బంధువును ప్రభుత్వ దవాఖానాకు తీసుకువస్తే డాక్టర్లు పట్టించుకోలేదని, దీంతో చనిపోయాడని ఆరోపిస్తూ మృతుడి కుటుంబసభ్యులు నిరసనకు దిగారు. బాధితుల కథనం ప్రకారం...నల్లగొండ జామామసీదుకు చెందిన కంది బుచ్చిరాములు(50) కిడ్నీ, లివర్ వ్యాధులతో బాధపడుతూ బుధవారం ప్రభుత్వ దవాఖానాలో అడ్మిట్అయ్యాడు. సిబ్బంది ఎమర్జెన్సీ వార్డుకు తరలించి ట్రీట్మెంట్అందిస్తుండగా చనిపోయాడు. అయితే డాక్టర్లు సకాలంలో వైద్యం అందించకపోవడంతోనే బుచ్చిరాములు చనిపోయాడని అతడి కుటుంబసభ్యులు, బంధువులు ఆరోపిస్తూ నిరసనకు దిగారు. డాక్టర్లు, సిబ్బందిపై చర్య తీసుకోవాలని హాస్పిటల్ఎదుట ధర్నా చేశారు. అక్కడికి వచ్చిన డాక్టర్లతో వాగ్వాదానికి దిగారు.
విషయం తెలుసుకున్న నల్లగొండ డీఎస్పీ నర్సింహారెడ్డి, సీఐ చంద్రశేఖర్రెడ్డి, ఎస్ఐ రాజశేఖర్రెడ్డి అక్కడికి వచ్చి ఇరువర్గాలను సముదాయించారు. ఈ సందర్భంగా ప్రశ్నించిన తమపైనే డాక్టర్లు దాడి చేయడానికి ప్రయత్నించారని బాధితులు ఆవేదన వ్యక్తం చేశారు. పైగా డాక్టర్లే రివర్స్లో తాము దాడి చేశామని పోలీసులకు ఫిర్యాదు చేశారని మృతుల కుమారులు వాపోయారు. దీంతో వీరిని పోలీస్స్టేషన్కు తీసుకువెళ్లి కొద్దిసేపటి తర్వాత వదిలేశారు. మరోవైపు ఐఎంఏ ఆధ్వర్యంలో డాక్టర్లు తమపై దాడి చేసిన రోగి బంధువులను శిక్షించాలని ఎస్పీ రెమా రాజేశ్వరికి ఫిర్యాదు చేశారు. ఈ విషయంపై జిల్లా దవాఖాన సూపరింటెండెంట్లచ్చూనాయక్ను ఫోన్లో వివరణ కోరేందుకు ప్రయత్నించగా ఆయన అందుబాటులోకి రాలేదు.
