బషీర్బాగ్, వెలుగు: ఆర్టీసీ బస్సులో చైన్ స్నాచింగ్కు పాల్పడ్డ దొంగను నారాయణగూడ పోలీసులు అరెస్ట్ చేశారు. ఎస్సై వెంకటేశ్ తెలిపిన వివరాల ప్రకారం.. రంగారెడ్డి జిల్లా చిన్నమంగళారం గ్రామానికి చెందిన బ్యాగరి పోచయ్య ఆర్టీసీ క్రాస్రోడ్లోని బీఎండబ్ల్యూ కార్ షోరూంలో హౌస్ కీపింగ్ సూపర్ వైజర్గా పనిచేస్తున్నాడు. బుధవారం ఉదయం డ్యూటీకి బయలుదేరిన పోచయ్య చిన్నమంగళారం నుంచి మెహిదీపట్నానికి వచ్చాడు.
అక్కడి నుంచి ఆర్టీసీ క్రాస్రోడ్కు వెళ్లేందుకు ‘113ఎం’ బస్సు ఎక్కాడు. నారాయణగూడ బస్టాప్ వద్దకు రాగానే అతడి మెడలో ఉన్న 1.5 తులాల గోల్డ్చైన్ కనిపించలేదు. బస్సులో నుంచి అనుమానాస్పదంగా కొందరు దిగిపోవడాన్ని గమనించిన పోచయ్య వెంటనే నారాయణగూడ పోలీసులకు కంప్లయింట్ చేశాడు. కేసు ఫైల్ చేసి దర్యాప్తు చేపట్టిన పోలీసులు సీసీ ఫుటేజ్ ఆధారంగా గోల్డ్ చైన్ను కొట్టేసిన దొంగను గుర్తించారు. టప్పాచబుత్ర ఏరియాలో ఉండే పాత నేరస్తుడు మహ్మద్ సద్దాం(30) చైన్ స్నాచింగ్ చేసినట్లు తేల్చారు. గురువారం అతడిని ఇంటి వద్దే అదుపులోకి తీసుకున్నారు. గోల్డ్చైన్ను రికవరీ చేశారు. నిందితుడిని రిమాండ్కు తరలించినట్లు ఎస్సై తెలిపారు.
