నవీన్ పొలిశెట్టి, మీనాక్షి చౌదరి జంటగా దర్శకుడు మారి రూపొందించిన చిత్రం ‘అనగనగా ఒక రాజు’. సూర్యదేవర నాగవంశీ, సాయి సౌజన్య నిర్మించారు. సంక్రాంతి సందర్భంగా జనవరి 14న సినిమా విడుదలవుతోంది. మంగళవారం ప్రీ రిలీజ్ ప్రెస్మీట్ నిర్వహించారు. ఈ సందర్భంగా నవీన్ పొలిశెట్టి మాట్లాడుతూ ‘మన తెలుగువారికి సంక్రాంతి అనేది ప్రత్యేకమైన పండుగ. ఎన్ని బాధలున్నా అవన్నీ మర్చిపోయి నలుగురితో నవ్వుకుంటూ చాలా సరదాగా ఉంటాం. అలాంటి ఎనర్జీనే ఈ చిత్రంలో చూడబోతున్నారు.
మన ఒత్తిడిని దూరం చేసి, హాయిగా నవ్వించేలా సినిమా ఉంటుంది. ట్రైలర్కి వచ్చిన రెస్పాన్స్ మా నమ్మకాన్ని రెట్టింపు చేసింది. ఇదొక ఫ్యామిలీ ఎంటర్టైనర్లా ఉంటుంది’ అని చెప్పాడు. ఈ చిత్రంతో హాయిగా నవ్వుకుంటూ.. సంక్రాంతి పండుగను జరుపుకోవచ్చు అని మీనాక్షి చౌదరి చెప్పింది. దర్శకుడు మారి మాట్లాడుతూ ‘పర్ఫెక్ట్ ఫెస్టివల్ ఎంటర్టైనర్ ఇది. థియేటర్కి వెళ్ళి బాధలన్నీ మర్చిపోయి రెండున్నర గంటల పాటు మనస్ఫూర్తిగా నవ్వుకునేలా ఉంటుంది’ అని అన్నాడు.
నిర్మాత నాగవంశీ మాట్లాడుతూ ‘గ్రామీణ నేపథ్యంలో సాగే పొలిటికల్ సెటైర్ ఎపిసోడ్ ఇందులో ఉంటుంది. సినిమా ఎంత నవ్విస్తుందో.. అదే సమయంలో చివరిలో ఒక మంచి ఎమోషన్ కూడా ఉంటుంది. కామెడీ, ఎమోషన్, ఫైట్, పాటలు ఇలా అన్ని అంశాలతో తెరకెక్కిన పండగ సినిమా ఇది’ అని అన్నారు. ఈ చిత్రంలో తాను పోషించిన పాత్ర అందర్నీ నవ్విస్తుందని బాల నటుడు రేవంత్ అన్నాడు.
