ముంబై: సోమాలియా సముద్రపు దొంగలు(పైరేట్స్) 35 మందితో కూడిన భారత యుద్ధ నౌక ఐఎన్ఎస్ కోల్‌‌కతా శనివారం ఉదయం ముంబైకి చేరుకుంది. ఈ దొంగలందరినీ ముంబై పోలీసులకు అప్పగించినట్టు ఇండియన్ నేవీ పేర్కొంది. వారిపై మారిటైమ్ యాంటీ పైరసీ యాక్ట్ 2022 ప్రకారం చర్యలు చేపట్టనున్నట్లు తెలిపింది. గత ఏడాది డిసెంబర్లో ఎక్స్‌-ఎంవీ రూయెన్‌ నౌకను సముద్రపు దొంగలు హైజాక్ చేశారు.
ఇతర దేశాల నౌకలను దోచుకునేందుకు దానిని ఉపయోగించారు. గత వారం కూడా ఈ దొంగలు బల్గేరియన్ నౌకను హైజాక్ చేశారు. అందులోని ప్యాసింజర్లను నిర్బంధించారు. ఈ విషయాన్ని గుర్తించిన ఇండియన్ నేవీ సముద్రపు దొంగలు నిర్బంధించిన వారిని విడిపించడానికి 'ఆపరేషన్ సంకల్ప్' చేపట్టింది. ఈ నెల 15న ఐఎన్ఎస్ కోల్‌‌కతా, ఐఎన్ఎస్ సుభద్ర, పీ81 విమానం, సీ గార్డియన్ యూఏవీతోపాటు పలు ఆధునిక డ్రోన్ల సాయంతో సముద్రపు దొంగలు హైజాక్ చేసిన ఎక్స్‌-ఎంవీ రూయెన్‌ నౌకను చుట్టుముట్టింది. 40గంటల పాటు ఆపరేషన్ చేపట్టి 35 మంది సముద్రపు దొంగలను బంధించింది. వారిని ఐఎన్ఎస్ కోల్‌‌కతా నౌకలో ముంబైకి తరలించి పోలీసులకు అప్పగించింది.
110 మందిని కాపాడినం
ఆపరేషన్ సంకల్ప్తో పాటు ఇతర మిషన్ల కింద ఇప్పటిదాకా 13 పైరేట్స్ వ్యతిరేక ఆపరేషన్స్ నిర్వహించినట్లు ఇండియన్ నేవీ వెల్లడించింది. ఈ ఆపరేషన్స్ ద్వారా 110 మంది ప్రాణాలను రక్షించామని తెలిపింది. ఇందులో 45 మంది భారతీయులుకాగా.. 65 మంది అంతర్జాతీయ పౌరులని పేర్కొంది. ఈ 65 మందిలో 27 మంది పాకిస్తానీయులు, 30 మంది ఇరానియన్లు ఉన్నారని వివరించింది.
