భారతీయ రైల్వేలో ఉద్యోగాల కోతకు రంగం సిద్ధమైంది. దాదాపు 30 వేల ఉద్యోగాలను రద్దు చేయాలని రైల్వే శాఖ నిర్ణయించింది. రద్దు చేసిన ఉద్యోగాలను అవసరాన్ని బట్టి ఇతర రైల్వే జోన్లకు కేటాయించాలని నిర్ణయించింది. ఈ నిర్ణయం కారణంగా.. రైల్వే ఉద్యోగాల్లో 2 శాతం కోత విధించినట్లయింది. 2026-27 ఆర్థిక సంవత్సరంలో భారతీయ రైల్వేలో మొత్తం 29 వేల 608 ఉద్యోగాలను రద్దు చేయడం జరుగుతుందని రైల్వే శాఖ తెలిపింది. ఈ మేరకు రైల్వే బోర్డు పేరుతో ఒక లేఖ సోషల్ మీడియాలో వైరల్ అయింది.
ఈ లేఖ చూస్తే.. ఏప్రిల్ 24, 2026 నాటి రైల్వే బోర్డు లేఖ ప్రకారం.. రైల్వేల హేతుబద్ధీకరణ లక్ష్యం కింద 3 వేల 303 ఉద్యోగాల రద్దుతో నార్త్ రైల్వే జోన్ అత్యధికంగా ప్రభావితం కానుంది. సెంట్రల్ రైల్వే జోన్ పరిధిలోని 2 వేల 492 ఉద్యోగాలు, వెస్ట్ రైల్వే జోన్లో 2 వేల 339 ఉద్యోగాలు రద్దు కాబోతున్నాయి. ప్రస్తుతం ఇండియన్ రైల్వేస్లో మొత్తం 14 లక్షల 80 వేల మందికి పైగా పనిచేస్తున్నారు. అందులో 29 వేల 608 ఉద్యోగాలు.. అంటే దాదాపు 2 శాతం ఉద్యోగాలు రద్దవుతాయని ఆ లేఖలో స్పష్టం చేశారు.
ఏ రైల్వే జోన్లో ఎన్ని ఉద్యోగాలు ప్రభావితం కానున్నాయంటే..
* నార్త్ రైల్వే: 3,303 పోస్టులు
* ఈస్ట్ రైల్వే: 2,544 పోస్టులు
* సెంట్రల్ రైల్వే: 2,492 పోస్టులు
* వెస్ట్ రైల్వే: 2,339 పోస్టులు
* సౌత్ ఈస్ట్ రైల్వే (SER), దక్షిణ మధ్య రైల్వే (SCR), దక్షిణ రైల్వే (SR), తూర్పు మధ్య రైల్వే (ECR)లలో 1,800 నుంచి 2,000 ఉద్యోగాలు
* నైరుతి రైల్వే (SWR)లో 893 పోస్టులు
