- నేపాలీ ముఠాకు రిమాండ్
- ఇండో-నేపాల్ సరిహద్దులో దొరికిన ఇద్దరు
- పరారీలో మరో ఇద్దరు
జూబ్లీహిల్స్, వెలుగు: జూబ్లీహిల్స్లో జరిగిన రూ.1.3 కోట్ల విలువైన బంగారం, వజ్రాభరణాల దొంగతనం కేసును పోలీసులు ఛేదించారు. వంట మనిషినే నిందితుడిగా తేల్చి, నేపాలీ దొంగల ముఠాలోని ఇద్దరిని అరెస్ట్ చేశారు. ఇన్స్పెక్టర్ వెంకటేశ్వర్ రెడ్డి వివరాల ప్రకారం.. నందగిరి హిల్స్కు చెందిన వ్యాపారి రవీంద్ర శర్మ ఇంట్లో నేపాల్కు చెందిన భూపేందర్ షాహి అలియాస్ భువన్ (22) వంట మనిషిగా పనిచేస్తున్నాడు. ఈ నెల 5న ఇంటి ఓనర్ బయటకు వెళ్లగానే ఇంట్లో పనిచేసే ఇతర సిబ్బందికి కూల్డ్రింక్లో మత్తుమందు కలిపి ఇచ్చి స్పృహ కోల్పోయేలా చేశాడు.
అనంతరం ఇంటి బయట వేచి ఉన్న తన సహచరులను లోపలికి పిలిపించి, ఇనుప రాడ్, స్క్రూ డ్రైవర్తో లాకర్ను బలవంతంగా తెరిచి నగలు దోచుకున్నారు. ఘటనాస్థలంలో నిందితులు వదిలివెళ్లిన మొబైల్ ఫోన్, సాంకేతిక సమాచారం ఆధారంగా ఇండో-–నేపాల్ సరిహద్దు వద్ద భూపేందర్ షాహి, కృష్ణ చంద్ (23)ను అదుపులోకి తీసుకుని రూ.1.3 కోట్ల విలువైన నగలు రికవరీ చేశారు. వీరిద్దరిని బుధవారం రిమాండ్కు తరలించారు. ప్రధాన సూత్రధారి జిబాన్ చంద్తో పాటు మరో ఇద్దరు నిందితులు పరారీలో ఉన్నారని, వారిని పట్టుకునేందుకు ప్రత్యేక బృందాలు గాలింపు చేపట్టినట్లు ఇన్స్పెక్టర్ తెలిపారు. ఇలాంటి ఘటనలు పునరావృతం కాకుండా గృహయజమానులు ఇంటి సిబ్బంది నియామకంలో పూర్తి వివరాలు ధ్రువీకరించుకోవాలని పోలీసులు సూచించారు.
