- స్టాండింగ్ కమిటీలో చర్చపై మేయర్ విజయలక్ష్మి స్పష్టత
- గుర్తింపు పొందిన మీడియాకు అడ్డంకులుండవని ప్రకటన
హైదరాబాద్సిటీ, వెలుగు: ప్రభుత్వ గుర్తింపు కార్డులు లేకుండా బల్దియా ఆఫీసుల్లోకి వచ్చి వేధిస్తున్న బోగస్ మీడియాపై మాత్రమే ఆంక్షలు విధించబోతున్నట్టు మేయర్గద్వాల్ విజయలక్ష్మి ప్రకటించారు. మీడియా ముసుగులో కొంత మంది బోగస్ విలేకర్లు బల్దియా అధికారులను బ్లాక్మెయిల్చేస్తూ డబ్బులు దండుకుంటున్నారని, వారి నుంచి కాపాడాలని స్టాండింగ్ కమిటీ సమావేశంలో అన్ని పార్టీల సభ్యులు కోరారన్నారు. త్వరలో జోనల్, సర్కిల్, హెడ్డాఫీసులోకి రాకుండా తీర్మానం చేస్తామన్నారు. నకిలీ విలేకరుల సమస్య నగరమంతా ఉందని, ఈ అంశంపై ప్రజా ప్రతినిధులకు అనేక ఫిర్యాదులు వస్తున్నాయన్నారు.
జీహెచ్ఎంసీ ఆఫీసుల్లోనూ తిష్టవేస్తూ సమస్యలు సృష్టిస్తున్నారని కంప్లయింట్స్ఉన్నాయన్నారు. గుర్తింపు పొందిన మీడియా సంస్థలు, మీడియా ప్రతినిధులకు అడ్డంకులు కల్పించాలన్నది స్టాండింగ్ కమిటీ ఉద్దేశం కాదన్నారు. మీడియా స్వేచ్ఛకు బల్దియా ఎప్పుడూ భంగం కలిగించదన్నారు. అయితే, అధికారుల డ్యూటీలకు ఇబ్బందులు కలగకుండా నిర్ణీత టైంలో కలుసుకునేలా పీఆర్వో వ్యవస్థను సర్కిల్/జోనల్ ఆఫీసుల్లో ఏర్పాటు చేస్తామన్నారు.
వారి ద్వారా సమాచారం ఇవ్వాలనేది స్టాండింగ్ కమిటీ సభ్యుల ఉద్దేశ్యమన్నారు. అయితే, బల్దియాలో మీడియా ప్రతినిధుల ప్రవేశంపై నిషేధం విధించే యోచనలో ఉన్నట్టు తెలిసిందని, దాన్ని తాము తీవ్రంగా ఖండిస్తున్నామని బీజేపీ మీడియా ఇన్చార్జి, మల్కాజిగిరి కార్పొరేటర్ శ్రవణ్ ఊరపల్లి అన్నారు.
