- నోయిడాలో డెలివరీ బాయ్ ఘోరం
- పట్టుకునేందుకు వచ్చిన పోలీసుల నుంచి తుపాకీ లాక్కుని పరార్
న్యూఢిల్లీ: కిరాణా సరుకులు ఇచ్చేందుకు వెళ్లిన డెలివరీ బాయ్.. ఇంట్లో ఒంటిరిగా ఉన్న మహిళపై అత్యాచారానికి ఒడిగట్టాడు. పరారీలో ఉన్న అతడిని పట్టుకునేందుకు వెళ్లిన పోలీసుల వద్ద లొంగిపోయినట్టే నటించిన ఆ యువకుడు.. వాళ్ల దగ్గరి నుంచి పిస్టల్ కొట్టేసి పారిపోయాడు. ఆపై పోలీసులు నానా తిప్పలు పడి అతడిని అరెస్ట్ చేశారు. ఉత్తరప్రదేశ్లోని నోయిడాలో ఈ ఘటన జరిగింది.
ఒంటరిగా ఉందని గమనించి..
గ్రేటర్ నోయిడాలోని అపార్ట్మెంట్లో ఉంటున్న మహిళ శుక్రవారం ఓ యాప్లో కిరాణా సామాన్ ఆర్డర్ చేసింది. డెలివరీ బాయ్గా పనిచేస్తున్న సుమిత్ సింగ్(23) అనే యువకుడు ఆర్డర్ డెలివరీ చేసేందుకు ఆమె అడ్రస్కు వెళ్లాడు. ఆ సమయంలో ఆమె ఇంట్లో ఒంటరిగా ఉన్నట్లు గమనించి లోపలికి వెళ్లాడు. ఆమెపై అత్యాచారం చేసి పరారయ్యాడు.
ఆ వెంటనే మహిళ ఫిర్యాదు చేయడంతో పోలీసులు దర్యాప్తు చేపట్టారు. మొబైల్ సిగ్నల్ ఆధారంగా సుమిత్ నోయిడాలోనే ఉన్నట్లు తెలుసుకుని వెళ్లిన పోలీసులకు చిక్కినట్లే నటించిన నిందితుడు కానిస్టేబుల్ దగ్గరున్న పిస్టల్ తీసుకుని పారిపోయాడు. దీంతో పోలీస్ స్పెషల్ టీమ్లు రంగంలోకి దిగాయి. వాళ్లంతా సుమిత్ ఉన్న అడ్రస్ ట్రేస్ చేసి వెళ్లగా నిందితుడు పిస్టల్తో కాల్చడం స్టార్ట్ చేశాడు.
దీంతో పోలీసులు ఎదురు కాల్పులు జరపడంతో సుమిత్ కాలుకి బులెట్ తగిలింది. ప్రస్తుతం అతడిని అరెస్ట్ చేసి ఆస్పత్రిలో ట్రీట్మెంట్ అందిస్తున్నారు.