భారీ అంచనాలతో పాన్ ఇండియా రేంజ్ లో రాబోతున్న యంగ్ రెబల్ స్టార్ ప్రభాస్ నెక్స్ట్ చిత్రం ఆది పురుష్ కొత్త విడుదల తేదీని మూవీ మేకర్స్ ప్రకటించారు. బాలీవుడ్ చిత్ర దర్శకుడు ఓం రౌత్ రూపొందిస్తున్న ఈ మూవీ జూన్ 16, 2023న విడుదల చేయనున్నట్టు ట్విట్టర్ వేదికగా వెల్లడించారు. మామూలుగా ఈ సినిమా జనవరి 12న రిలీజ్ కావాల్సి ఉండగా.. తాజాగా విడుదల తేదీలో మార్పు చేస్తూ కొత్త డేట్ ను ప్రకటించింది. రామాయణం ఆధారంగా తెరకెక్కనున్న ఈ చిత్రంలో ప్రభాస్ రాముడిగా కనిపిస్తుండగా.. కృతి సనన్ సీత పాత్రలో నటిస్తోంది.
ఆది పురుష్ సినిమాకు సంబంధించి ఇప్పటికే విడుదల టీజర్ కు ప్రేక్షకుల నుంచి మిశ్రమ స్పందన వచ్చింది. సినిమాలో విజువల్ ఎఫెక్ట్స్ ఏ మాత్రం బాగోలేవని, కార్టూన్స్‌లాగా ఉన్నాయని ప్రభాస్ అభిమానులు దర్శక, నిర్మాతలపై పలువురు మండిపడ్డారు. నేపథ్యంలో చిత్ర బృందం సినిమా విజువల్ ఎఫెక్ట్స్‌పై మరొకసారి పనిచేయనున్నట్టు సమాచారం. ఈ గ్రాఫిక్స్ కు సంబంధించి దాదాపు 100 కోట్ల రూపాయల ఖర్చవ్వబోతున్నట్లుగా వార్తలు కూడా వినిపిస్తున్నాయి. ఈ నేపథ్యంలోనే సినిమా విడుదల కూడా వాయిదా పడిందని సమాచారం. ఇదిలా ఉండగా రావణాసురుడి పాత్రలో సైఫ్ అలీ ఖాన్, లక్ష్మణుడి పాత్రలో సన్నీ సింగ్ నటిస్తున్నారు. భారీ బడ్జెట్‌తో టీ సిరీస్ నిర్మిస్తోన్న ఈ సినిమాకి అజయ్ అతుల్ సంగీతాన్ని అందిస్తున్నారు.
