ఉప్పల్, వెలుగు: ఎమర్జెన్సీ కాల్ అందడమే ఆలస్యం నిమిషాల్లో స్పందించి, ఆత్మహత్యకు యత్నించిన వ్యక్తిని ఉస్మానియా యూనివర్సిటీ (ఓయూ) పోలీసులు సురక్షితంగా కాపాడారు. ఆర్థిక ఇబ్బందుల వల్ల మల్లేశ్ అనే వ్యక్తి ఉరి వేసుకుంటున్నాడంటూ ఆదివారం రాత్రి డయల్-100కు సమాచారం వచ్చింది. వెంటనే ఓయూ ఇన్స్పెక్టర్ మహేశ్ అప్రమత్తమై బ్లూ కోల్ట్స్-3 సిబ్బంది, కానిస్టేబుళ్లు విజయ్ కుమార్ నాయక్, తిరుపతిని రంగంలోకి దించారు.
వారు సాంకేతిక పరిజ్ఞానం సాయంతో మణికేశ్వరనగర్లోని బాధితుడి ఇంటిని నిమిషాల్లో గుర్తించారు. పోలీసులు అక్కడికి చేరుకునే సమయానికే మల్లేశ్ ఉరితాడుకు వేలాడుతుండటంతో, వెంటనే లోపలికి వెళ్లి అతడిని కిందికి దించి ప్రాణాలు కాపాడారు. అనంతరం బాధితుడికి పోలీస్ స్టేషన్లో కౌన్సిలింగ్ ఇచ్చి కుటుంబ సభ్యులకు అప్పగించారు. సకాలంలో స్పందించి ప్రాణాలు కాపాడిన పోలీసులను స్థానికులు అభినందించారు.
