అడిలైడ్‌: టీ 20 వరల్డ్‌ కప్‌ సూపర్‌12 రౌండ్‌ పోటీల చివరి రోజు అనూహ్య ఫలితాలు వచ్చాయి. గ్రూప్–2 నుంచి సెమీఫైనల్‌ ఫేవరెట్‌‌గా కనిపించిన సౌతాఫ్రికాను ఓడించిన నెదర్లాండ్స్‌ సంచలనం సృష్టించింది. ఈ దెబ్బకు సఫారీ టీమ్ సెమీస్ నుంచి వైదొలగడం పాకిస్థాన్‌‌కు లైఫ్‌ లైన్‌ లభించింది. ఇండియా, జింబాబ్వే చేతిలో ఓడి వెనుకబడిన పాక్‌ ఈ అవకాశాన్ని రెండు చేతులా ఒడిసిపట్టుకుంది. తమ ఆఖరి పోరులో బంగ్లాదేశ్‌‌ను ఓడించి సెమీస్ బెర్తు సొంతం చేసుకుంది. ఆదివారం జరిగిన ఈ మ్యాచ్లో పాక్‌ 5 వికెట్ల తేడాతో బంగ్లాపై గెలిచింది. టాస్‌ నెగ్గి ఫస్ట్‌ బ్యాటింగ్‌‌కు వచ్చిన బంగ్లాను బౌలర్లు 20 ఓవర్లలో127/8 స్కోరుకే కట్టడి చేశారు. ఓపెనర్ నజ్ముల్ శాంటో (48 బాల్స్‌‌లో 7 ఫోర్లతో 54) రాణించాడు. యంగ్‌ పేసర్ షాహీన్ షా ఆఫ్రిది (4/22), స్పిన్నర్‌ షాదాబ్ ఖాన్ (2/30) వరుసగా వికెట్లు తీసి బంగ్లాను దెబ్బకొట్టారు. అనంతరం పాక్‌ 18.1 ఓవర్లలో128/5 స్కోరు చేసి గెలిచింది. ఓపెనర్ రిజ్వాన్ (34), కెప్టెన్ బాబర్ (24), మొహమ్మద్ హారిస్ (31 నాటౌట్), షాన్ మసూద్ (24 నాటౌట్) రాణించారు. షాహీన్‌‌కు ప్లేయర్‌ ఆఫ్‌ ద మ్యాచ్ అవార్డు దక్కింది.
సౌతాఫ్రికా చేజేతులా..
చిన్న జట్టు నెదర్లాండ్స్‌‌పై గెలిస్తే 7 పాయింట్లతో సెమీస్ చేరే అవకాశాన్ని సౌతాఫ్రికా చేజార్చుకుంది. డచ్ టీమ్ అద్భుత బౌలింగ్, ఫీల్డింగ్ దెబ్బకు సాధారణ టార్గెట్‌‌ను కూడా ఛేజ్‌ చేయలేక 13 రన్స్ తేడాతో ఓడింది. టాస్‌ ఓడిన నెదర్లాండ్స్‌ తొలుత 20 ఓవర్లలో 158/4 స్కోరు చేసింది. అకెర్‌‌మన్‌ (41 నాటౌట్), మైబర్గ్‌ (37), కూపర్‌ (35), ఒడౌడ్‌ (39) రాణించారు. సఫారీ బౌలర్లలో కేశవ్‌ రెండు వికెట్లు తీశాడు. అనంతరం టార్గెట్‌ ఛేజింగ్‌‌లో సౌతాఫ్రికా 145/8 స్కోరుకే పరిమితం అయింది. ఓపెనర్లు డికాక్‌ (13 బాల్స్‌‌లో 13), బవూమ (20 బాల్స్‌‌లో 20)తో పాటు రిలీ రొసో (19 బాల్స్‌‌లో 25) నింపాదిగా ఆడటంతో ఒత్తిడి పెరిగింది. అయినా 15 ఓవర్లకు 111/4 తో నిలిచిన సఫారీ టీమ్‌‌కే మొగ్గు కనిపించింది. కానీ, 16వ ఓవర్లో మిల్లర్ (17), పార్నెల్‌ (0)ను ఔట్‌ చేసిన గ్లోవర్‌ (3/9) సఫారీలను దెబ్బకొట్టాడు. ముఖ్యంగా మిల్లర్ ఇచ్చిన క్యాచ్ను స్క్వేర్ లెగ్లో మెర్వే అద్భుతంగా అందుకోవడం మ్యాచ్లో టర్నింగ్ పాయింట్ అయింది. చివరి 4 ఓవర్లలో 44 రన్స్ అవసరం అవగా... హిట్టర్‌ హెన్రిచ్‌ క్లాసెన్‌ (18 బాల్స్‌‌లో 21), కేశవ్‌ (13) సఫారీలను గట్టెక్కించలేకపోయారు. దాంతో, సౌతాఫ్రికా రెండో ఓటమితో ఐదు పాయింట్లతో మూడో స్థానంతో సరిపెట్టి సెమీస్కు దూరమైంది. జింబాబ్వేతో మ్యాచ్ వర్షం వల్ల రద్దవడం సఫారీ టీమ్‌‌ను దెబ్బతీసింది. పాక్‌ 3 విజయాలు, 2 ఓటములు, 6 పాయింట్లతో రెండో ప్లేస్‌‌తో సెమీస్ చేరింది. నెదర్లాండ్స్‌ 2 విజయాలు, 4 పాయింట్లతో నాలుగో స్థానం సాధించింది.
