స్మార్ట్ గా ప్రచారం.. విరివిగా సోషల్ మీడియా వినియోగం

• వాట్సాప్​ గ్రూపులు.. ఫేస్​ బుక్​.. ఇన్​స్ట్రాలో పోస్టులు
• అదనపు ఖర్చు లేకుండా ప్రచారం 

యాదాద్రి, వెలుగు: పల్లెలో ఎటు చూసినా పంచాయతీ ఎన్నికల సందడే కనిపిస్తోంది. గెలుపే లక్ష్యంగా అభ్యర్థులు ముందుకు సాగుతున్నారు. సోషల్​ మీడియా వేదికగా అభ్యర్థులు ప్రచారం హోరెత్తిస్తున్నారు. మూడు విడతల్లో జరగాల్సిన పంచాయతీల్లో నామినేషన్ల ప్రక్రియ ముగిసింది. మొదటి విడతకు సంబంధించి అభ్యర్థులు ఎవరో తేలిపోయింది. రెండో విడత ఎన్నికల జరిగే పంచాయతీల్లో శనివారం విత్​ డ్రా ప్రక్రియ ముగిసిన వెంటనే అభ్యర్థులెవరో తేలిపోనుంది. ఆ వెంటనే అభ్యర్థులకు గుర్తులు కూడా కేటాయిస్తారు. ఇక మూడో విడతకు సంబంధించి స్క్రూటినీ, విత్​ డ్రా, అభ్యర్థులెవరో రెండు రోజుల్లో తేలిపోతుంది. ఈ నెల 11, 14, 17 తేదీల్లో పోలింగ్​ జరుగుతుంది. 

మొత్తంగా 11 రోజులే గడువు

ఈ నెల 11న జరిగే మొదటి విడతకు సంబంధించి ప్రచారానికి ఐదు రోజులే గడువుంది. ఆ తర్వాత వరుసగా రెండు, మూడు దశల ఎన్నికల వరకూ ప్రచారం కోసం ఉన్నది మొత్తంగా 11 రోజులే. ప్రచారానికి తక్కువ సమయం ఉండడం, ఓటర్లుకుడా తక్కువగానే ఉన్నా ప్రచారానికి ఖర్చు మాత్రం తగ్గేట్టు కన్పించడం లేదు. అసెంబ్లీ, పార్లమెంట్​ ఎన్నికల అనుభవంతో అభ్యర్థులనుంచి ఓటర్లు ఏవో ప్రయోజనాలను ఆశిస్తున్నట్టు కనిపిస్తోంది. ముందే ఖర్చులకు ప్రిపేర్​ అయిన అభ్యర్థులు కూడా పోలింగ్​ ముందు రోజూ చూసుకోవచ్చన్నట్టు వ్యవహరిస్తున్నారు. 

సోషల్​ మీడియా ప్రచారం 

డిజిటల్​ యుగంలో అందరూ స్మార్ట్‌ఫోన్లు వాడుతున్నారు. ప్రతి ఒక్కరూ వాట్సప్, ఫేస్‌బుక్, ఇన్‌స్టాగ్రామ్, ఎక్స్, యూట్యూబ్‌ తదితర సోషల్ మీడియా యాప్స్​ విరివిగా చూస్తున్నారు. దీంతో ఈ ఎన్నికల్లోనూ సోషల్​ మీడియాను ప్రచారాస్త్రంగా అభ్యర్థులు ఎంచుకున్నారు. ఇప్పటికే వార్డుకో వాట్సాప్​ గ్రూప్​ ఏర్పాటు చేశారు. అందులోనూ యువత, మహిళలకు వేర్వేరు గ్రూపులు ఉన్నాయి. ఇప్పుడు ప్రత్యేకంగా గ్రామాలకు వాట్సప్, ఫేస్‌బుక్, ఇతర సోషల్ మీడియాలో వారి మద్దతుదారులు, గ్రామస్థుల సెల్​ఫోన్ నంబర్లతో ప్రత్యేక వాట్సప్‌ గ్రూపులు ఏర్పాటు చేస్తున్నారు. 

ఈ గ్రూపుల్లో ఎన్నికల విజ్ఞాపనలు కుప్పలుగా ముంచెత్తుతున్నాయి. సోషల్​ మీడియాలో ప్రచారం ద్వారా అభ్యర్థులకు పైసా కూడా ఖర్చు లేదు. ప్రతి ఒక్కరూ నెట్​ కనెక్షన్​ కలిగి ఉన్న వారే. కాకుంటే పోస్టర్లను తయారు చేయించుకోవడానికి డిజైనర్లను ఆశ్రయిస్తున్నారు. వాటిని గ్రూపుల్లో పోస్ట్​ చేస్తున్నారు. తాము గెలిస్తే ఏం అభివృద్ధి చేయాలనుకుంటున్నారో ప్రజలకు వివరించేందుకు ప్రయత్నిస్తున్నారు. వీటి ద్వారా ఓటర్లను ప్రసన్నం చేసుకునే ప్రయత్నం చేస్తున్నారు. పార్టీల మద్దతుదారులు, స్వతంత్ర అభ్యర్థులు కూడా చురుగ్గా ప్రచారం చేస్తున్నారు. 

హోంగార్డుల సంక్షేమానికి కృషి

సూర్యాపేట, వెలుగు: హోంగార్డుల సంక్షేమానికి కృషి చేస్తానని ఎస్పీ నరసింహ తెలిపారు. హోంగార్డుల ఆవిర్భావ దినోత్సవం సందర్భంగా శుక్రవారం జిల్లా పోలీస్  ఆఫీస్​ ఆవరణలో ఏర్పాటు చేసిన రక్తదాన శిబిరం, క్రీడా పోటీలను ఎస్పీ ప్రారంభించారు. హోంగార్డులు పోలీసులతో సమానంగా శాంతి భద్రతల పరిరక్షణ కోసం పని చేస్తున్నారని అభినందించారు. అడిషనల్​ ఎస్పీలు రవీందర్ రెడ్డి, జనార్దన్ రెడ్డి, ఎస్బీ ఇన్స్​పెక్టర్​ రామారావు, హోంగార్డ్  ఇన్​చార్జి ఆర్ఎస్సై అశోక్, సాయిరాం, సురేశ్​ ఉన్నారు.