సర్టిఫికెట్ల కోసం.. ఉరుకులు పరుగులు!

• కిటకిటలాడుతున్న తహసీల్దార్  ఆఫీస్​లు, మీసేవా కేంద్రాలు
• మొరాయిస్తున్న సర్వర్లు
• మ్యానువల్​గా సర్టిఫికెట్లు జారీ!

గద్వాల, వెలుగు: సర్పంచ్, వార్డు మెంబర్​ పదవులకు పోటీ చేస్తున్న అభ్యర్థులు సర్టిఫికెట్ల కోసం ఉరుకులు, పరుగులు పెడుతున్నారు. మొదటి విడత నామినేషన్లకు మరో రోజు మాత్రమే గడువు ఉండడంతో ఆందోళన చెందుతున్నారు. సర్టిఫికెట్ల కోసం మీసేవా కేంద్రాలకు వెళ్తే సర్వర్లు సతాయిస్తుండడంతో, తహసీల్దార్​ ఆఫీసుల్లో సర్టిఫికెట్లను మ్యానువల్ గా జారీ చేస్తున్నారు. బీసీ, ఎస్సీ, ఎస్టీ అభ్యర్థులు తప్పనిసరిగా క్యాస్ట్​ సర్టిఫికెట్  జత చేయాలి. ఈ సర్టిఫికెట్ల కోసం తహసీల్దార్, మీ సేవా కేంద్రాలకు అభ్యర్థులు పోటెత్తుతున్నారు. ఫస్ట్​ ఫేజ్​లో జోగులాంబ గద్వాల జిల్లాలోని ధరూర్, కేటిదొడ్డి, గట్టు, గద్వాల మండలాల పరిధిలో పంచాయతీ ఎన్నికలు జరుగుతున్నాయి.

సర్టిఫికెట్లు తప్పనిసరి..

ఎస్సీ, ఎస్టీ, బీసీలకు రిజర్వ్​ అయిన సర్పంచ్, వార్డు స్థానాల్లో పోటీ చేసే అభ్యర్థులు తప్పనిసరిగా క్యాస్ట్  సర్టిఫికెట్  జత చేయాల్సి ఉంటుంది. అలాగే గ్రామపంచాయతీకి ఎలాంటి డ్యూ లేదని నో డ్యూ సర్టిఫికెట్, ఆధార్  కార్డు, ఓటర్  ఐడీ కార్డు తప్పనిసరిగా జత చేయాలి. ఈ నెల 25న గ్రామపంచాయతీ ఎన్నికల షెడ్యూల్​ రిలీజ్​ కాగా, 26న రిజర్వేషన్లు ఖరారయ్యాయి. ఆ మరుసటి రోజే అంటే 27 నుంచి నామినేషన్ల స్వీకరణ ప్రారంభమైంది.

 నామినేషన్ల స్వీకరణకు మూడు రోజులు గడువు విధించడం, ఆ గడువు శనివారంతో ముగియనుండడంతో సర్పంచ్, వార్డు సభ్యులు వివిధ సర్టిఫికెట్ల కోసం ఉరుకులు పరుగులు పెట్టాల్సిన పరిస్థితి ఉంది. అలాగే పోటీ చేసే అభ్యర్థులు తప్పనిసరిగా కొత్త బ్యాంక్​ అకౌంట్ ఓపెన్​ చేయాలని రూల్  ఉండడంతో అందుబాటులో ఉన్న బ్యాంకుల్లో ఖాతాలు తీసకుంటున్నారు. హౌస్  టాక్స్, వాటర్  టాక్స్ కట్టేసి, నో డ్యూ  సర్టిఫికెట్లు తీసుకుంటున్నారు.

సర్పంచ్ తో పాటు వార్డు మెంబర్లకు కూడా..

మొదటి విడతలో గద్వాల జిల్లాలో 106 జీపీలు, నారాయణపేటలో 67, మహబూబ్ నగర్ లో 139, నాగర్ కర్నూల్ లో 151, వనపర్తి జిల్లాలో 87 జీపీలకు ఎన్నికలు జరుగుతున్నాయి. గద్వాల జిల్లాలో బీసీలకు 70 స్థానాలు, ఎస్సీలకు 51 స్థానాలు, ఎస్టీలకు 5 స్థానాలు రిజర్వ్​ అయ్యాయి. జిల్లాలో బీసీలకు 700, ఎస్సీలకు 458, ఎస్టీలకు 49 వార్డు స్థానాలు రిజర్వ్​ అయ్యాయి. ఈ లెక్కన ఎస్సీ, ఎస్టీ, బీసీలకు సంబంధించిన 1,207 స్థానాల్లో పోటీ చేసేవారు కుల సర్టిఫికెట్లు తీసుకోవాల్సి ఉంది. ఇలా ఎంత మంది పోటీ చేస్తే అంత మంది సర్టిఫికెట్లు తీసుకోక తప్పదు. 

సతాయిస్తున్న సర్వర్లు..

మీసేవా కేంద్రాల్లో క్యాస్ట్  సర్టిఫికెట్ల కోసం దరఖాస్తు చేసేందుకు వెళ్తే సర్వర్లు సతాయిస్తున్నాయి. దీంతో పోటీ చేసే అభ్యర్థులు ఆందోళనకు గురయ్యారు. రాష్ట్రవ్యాప్తంగా ఇదే సమస్య ఉత్పన్నమైంది. ఈక్రమం లో అభ్యర్థులు తహసీల్దార్లను కలిసి సర్టిఫికెట్లు మ్యానువల్ గా జారీ చేయాలని రిక్వెస్ట్​ చేశారు. సాయం త్రం వరకు సమస్య అలాగే ఉండడంతో నామినేషన్  పత్రాల్లో మ్యానువల్​గా ఉండే క్యాస్ట్  సర్టిఫికెట్ పై డిప్యూటీ తహసీల్దార్లతో సంతకాలు చేయించి అందజేయడంతో అభ్యర్థులకు ఊరట లభించింది.

ఊపందుకున్న నామినేషన్లు..

మొదటి విడత ఎన్నికలు జరుగుతున్న గ్రామ పంచాయతీల్లో రెండో రోజు శుక్రవారం నామినేషన్లు ఊపందుకున్నాయి. శనివారం నామినేషన్లకు చివరి రోజు కావడంతో భారీగా నామినేషన్లు దాఖలయ్యే అవకాశం ఉండగా, అందుకు అనుగుణంగా అధికారులు ఏర్పాట్లు చేస్తున్నారు. 

నారాయణపేట జిల్లాలోని 67 గ్రామపంచాయతీల్లో సర్పంచ్​ స్థానాలకు 76, 572 వార్డు సభ్యులకు గాను 104 నామినేషన్లు దాఖలయ్యాయి.    

మహబూబ్​నగర్  జిల్లాలోని 139 గ్రామపంచాయతీల్లోని సర్పంచ్​ స్థానాలకు 143 నామినేషన్లు, 1,188 వార్డులకు 211 నామినేషన్లు దాఖలయ్యాయి.

వనపర్తి జిల్లాలో సర్పంచ్​ స్థానాలకు 157, వార్డులకు 250 నామినేషన్లు దాఖలయ్యాయి.

జోగులాంబ గద్వాల జిల్లాలో 106 సర్పంచ్ స్థానాలకు 100 నామినేషన్లు, వార్డులకు 84 నామినేషన్లు దాఖలయ్యాయి

నాగర్ కర్నూల్ జిల్లాలో సర్పంచ్​ స్థానాలకు 203, వార్డులకు 345 నామినేషన్లు దాఖలైనట్లు అధికారులు తెలిపారు.