- ఎమ్మెల్యే శ్రీధర్బాబు డబ్బులిచ్చి ప్రచారం చేస్తున్నారు
- నన్ను లోపల పెట్టే ప్రయత్నం చేస్తున్నరు.. నేను ఆగను గాక ఆగను
- వామన్రావు హత్య కేసు విచారణ పూర్తయ్యాక హైదరాబాద్లో ప్రెస్మీట్ పెడతా
- టీఆర్ఎస్ మెంబర్షిప్ నమోదు కార్యక్రమంలో పుట్ట మధు కామెంట్స్‌
పెద్దపల్లి, వెలుగు: ‘‘నేను ఎక్కడికీ పారిపోలేదు. ఎవరికీ మొహం చాటేయలేదు. టీఆర్ఎస్ హైకమాండ్ నన్ను పిలవలేదు. నాకు కేసీఆర్, కేటీఆర్ అపాయింట్మెంట్ తిరస్కరించారన్న ప్రచారం నిజం కాదు” అని పెద్దపల్లి జడ్పీ చైర్పర్సన్ పుట్ట మధు అన్నారు. హైకోర్టు లాయర్లు వామన్ రావు, నాగమణి దంపతుల హత్య తర్వాత పుట్ట మధు తొలిసారిగా స్పందించారు. మంథని మండల టీఆర్ఎస్ మెంబర్షిప్ నమోదు కార్యక్రమంలో పాల్గొని మాట్లాడారు. ఎమ్మెల్యే శ్రీధర్ బాబు ఇస్తున్న డబ్బులకు అమ్ముడుపోయి కొందరు తనపై తప్పుడు ప్రచారం చేస్తున్నారని ఆరోపించారు. తనకు పార్టీ పెద్దలు అపాయింట్మెంట్ ఇవ్వలేదంటూ కొందరు పిచ్చికూతలు కూస్తున్నారని విమర్శించారు. నియోజకవర్గంలోని బీసీలు, ఎస్సీలు, మైనార్టీలు తన స్థాయికి ఎదిగే వరకు పోరాటం చేస్తానన్నారు.
పూర్తి జీవితం టీఆర్ఎస్ కోసమే..
‘‘నేను మంథని మట్టి బిడ్డను. రేషం కల్ల బిడ్డను. నేను వజ్రాన్ని. నేను మోసగాడ్ని కాదు. మొన్నటి వరకు కుటుంబం అంతా ఉన్నం. బిడ్డకు, కొడుకుకు పెండ్లి చేసిన. ఇక ఏం పనిలేదు. నా పూర్తి జీవితకాలం టీఆర్ఎస్ పార్టీ కోసం, మంథని నియోజకవర్గ ప్రజల కోసమే. ఎమ్మెల్యే శ్రీధర్బాబు తొత్తులు నన్ను లోపలపెట్టే ప్రయత్నం చేస్తున్నారు. ఇలా ఎన్ని చేసినా నేను ఆగను గాక ఆగను..” అని పుట్ట మధు స్పష్టం చేశారు. శ్రీధర్బాబు పేపర్లను, టీవీలను అడ్డం పెట్టుకొని బెదిరించాలని చూస్తున్నారని.. తన కుటుంబంపై తప్పుడు ఆరోపణలు చేస్తున్నారని పేర్కొన్నారు. కాంగ్రెస్ పార్టీ కొందరిని కొనుగోలు చేసి ఎలా గెలుస్తుందో అందరికీ తెలుసని కామెంట్ చేశారు. మంథని చరిత్రలో ఒక బీసీ ఇంతగా ఎదగడాన్ని శ్రీధర్బాబు సహించడం లేదని.. బీసీ బిడ్డ అయిన తాను ఎమ్మెల్యే, జడ్పీ చైర్మన్ అయినందుకు ఓర్వలేక తప్పుడు ప్రచారం చేస్తున్నారన్నారు. శ్రీధర్బాబు డబ్బులకు అమ్ముడుపోయిన కొన్ని టీవీలు, పేపర్లు తనను భయపెట్టే ప్రయత్నం చేస్తున్నాయని ఆరోపించారు. వామన్రావు హత్య కేసు విచారణ పూర్తయిన తర్వాత హైదరాబాద్లో ప్రెస్ మీట్పెట్టి ఆ పేపర్, టీవీల పేర్లు చెప్తానన్నారు. అసలు మంథని ఎమ్మెల్యే శ్రీధర్ బాబు, అతని తండ్రి ఎలా పైకి వచ్చారో నియోజకవర్గ ప్రజలకు అర్థమయ్యేలా చెప్తానని, వారి అవినీతి బాగోతాన్ని బయటపెడ్తానని పేర్కొన్నారు.
