రాష్ట్రంలో పెంచిన ‘ఆసరా’ పింఛన్లు ఈ నెల నుంచే లబ్ధిదారులకు అందనున్నాయి. రెండు, మూడు రోజుల్లో సొమ్ము అకౌంట్లలో జమకానుంది. కానీ ఈ నెలలో కొత్తగా లబ్ధిదారులెవరికీ పింఛన్లు అందడం లేదు. వృద్ధాప్య పింఛన్ వయసు పరిమితి తగ్గించిన నేపథ్యంలో సుమారు ఏడు లక్షల మంది కొత్తగా అర్హత పొందారు. వారంతా పింఛన్ కోసం దరఖాస్తులు చేసుకున్నారు. దాదాపు అన్ని జిల్లాల్లో లబ్ధిదారుల ఎంపిక అయిపోయింది. హైదరాబాద్లో మాత్రం ప్రక్రియ పూర్తికాకపోవడంతో ఫైనల్ లిస్టు సిద్ధం కాలేదు. దాంతో కొత్త పింఛన్ల మంజూరు జాప్యం కానుంది.
ఎలక్షన్ హామీ మేరకు..
ఆసరా పింఛన్లను డబుల్ చేస్తామని, వృద్ధాప్య పింఛన్ వయసును 57 ఏళ్లకు తగ్గిస్తామని అసెంబ్లీ ఎలక్షన్ల సమయంలో సీఎం కేసీఆర్ ప్రకటించారు. డిసెంబర్లోనే కొత్త ప్రభుత్వం ఏర్పాటైనా పింఛన్ల పెంపు అమల్లోకి రాకపోవడంతో ఆందోళన వ్యక్తమైంది. దాంతో చివరికి గత నెలలో వివిధ వర్గాలకు ఇస్తున్న పింఛన్ను రూ.1,000 నుంచి రూ.2,016 కు, వికలాంగులకు రూ.1,500 నుంచి రూ.3,016 కు పెంచుతూ ఉత్తర్వులు జారీ చేసింది. ఈ నెల నుంచి లబ్ధిదారులకు అందనున్నాయి. ఇప్పటివరకు 39 లక్షల మందికి ఆసరా పింఛన్లు అందుతుండగా.. రూ.5 వేల కోట్లు వ్యయమయ్యేది. పింఛన్ల మొత్తం పెంపు, అర్హత వయసు తగ్గింపుతో వచ్చే కొత్త లబ్ధిదారులకు కలిపి.. రూ.12 వేల కోట్లు అవసరమవుతాయని అంచనా. ఈ మేరకు సర్కారు ఓటాన్ అకౌంట్ బడ్జెట్లో కేటాయింపులు కూడా చేసింది.
వరుస ఎన్నికలతో జాప్యం…
అసెంబ్లీ ఎలక్షన్లలో వినియోగించిన ఓటర్ల జాబితా ఆధారంగా కొత్తగా వృద్ధాప్య పింఛన్ లబ్ధిదారులను ఎంపిక చేయాలని సర్కారు నిర్ణయించింది. కానీ వరుసగా ఎలక్షన్లు రావడంతో ఎంపికలో జాప్యం జరిగింది. మరోవైపు అనారోగ్యం, ఇతర కారణాలతో మరణిస్తున్న వారితో లబ్ధిదారుల సంఖ్య స్వల్పంగా తగ్గుతోంది. ఏప్రిల్లో 10 వేల మంది, జూన్లో మరో 7,820 మంది తగ్గినట్లు సెర్ప్ అధికారులు చెబుతున్నారు.
