బెంగళూరు: కర్నాటక అసెంబ్లీకి మేలో ఎన్నికలు జరగబోతుండడంతో పార్టీ బలోపేతం దిశగా బీజేపీ అడుగులు వేస్తోంది. ఇందులో భాగంగా ప్రత్యర్థి పార్టీల కంచుకోట ఓల్డ్ మైసూరులో పాగా వేయడంతోపాటు సొంత పార్టీలో అసంతృప్తులను చల్లార్చేందుకు ప్రయత్నాలు చేస్తోంది. చాలా రోజులుగా పెండింగ్లో ఉన్న రాష్ట్ర కేబినెట్ విస్తరణకు కేంద్ర హోం మంత్రి అమిత్షా ఆమోదముద్ర వేశారు. పార్టీ బూత్ స్థాయి కార్యకర్తలతో శనివారం బెంగళూరులో జరిగిన కీలక సమావేశంలో అమిత్షా ఈ మేరకు నిర్ణయాన్ని ప్రకటించారు. పార్టీపై అసంతృప్తితో ఉన్న ఎమ్మెల్యేలు కేఎస్ ఈశ్వరప్ప, రమేశ్ జార్కిహోళి వంటి వారికి కేబినెట్‌‌లో చోటు దక్కే అవకాశం ఉంది.
వొక్కలిగులకు దగ్గరయ్యేందుకు..
జేడీఎస్, కాంగ్రెస్ పార్టీకు కంచుకోటగా ఉన్న ఓల్డ్ మైసూరు ప్రాంతంలో పార్టీని విస్తరించడానికి బీజేపీ ప్రయత్నాలు చేస్తోంది. ఇక్కడ మాండ్య, మైసూరు, హసన్, తుమకూరు, చామరాజనగర్, బెంగళూరు రూరల్, కోలార్, చిక్బల్లాపూర్ వంటి జిల్లాలు ఉన్నాయి. 2019లో మాత్రమే ఇక్కడ బీజేపీ ఖాతా ఓపెన్ చేసింది. మాండ్యాలో ఏడు అసెంబ్లీ సీట్లు ఉంటే.. జేడీఎస్ 6, బీజేపీ ఒక చోట విజయం సాధించాయి. కర్నాటక జనాభాలో 15 శాతం ఉన్న వొక్కలిగ కమ్యూనిటీదే ఓల్డ్ మైసూరులో ఆధిపత్యం. లింగాయత్‌‌ల తర్వాత అతిపెద్ద ఓటు బ్యాంకు వీరిదే. శనివారం కర్నాటకలో జరిగిన బహిరంగ సభలో షా పాల్గొన్నారు. రాష్ట్రంలో కాంగ్రెస్ గెలిస్తే అది ఢిల్లీ ఏటీఎం అవుతుందని, జేడీఎస్ గెలిస్తే ఫ్యామిలీ ఏటీఎం అవుతుందని అమిత్ షా విమర్శించారు.
