సడలింపు టైం పెంచాలని కేసీఆర్‌కు జనం వినతులు

• సడలింపు టైం పెంచండి 
• సీఎం కేసీఆర్‌కు జనం వినతులు
• 4 గంటల్లో గుంపులుగా బయటికొచ్చి ఆగం అయితున్నరు
• ఉదయం 6 నుంచి 12 దాకా పెట్టాలని సూచనలు

హైదరాబాద్‌, వెలుగు: రాష్ట్రంలో లాక్‌డౌన్‌ సడలింపు సమయాన్ని పెంచాలని డిమాండ్లు వినిపిస్తున్నాయి. ఇప్పుడున్న 4 గంటల సమయం సరిపోవట్లేదని, మధ్యాహ్నం 12 గంటలవరకైనా పెంచాలని సోషల్ మీడియాలో కోరుతున్నారు. ఈ మేరకు ఫేస్‌బుక్‌, ట్విట్టర్‌లో సీఎం కేసీఆర్‌కు విన్నవిస్తున్నారు. సడలింపు సమయం తక్కువగా ఉండటంతో ప్రజలంతా గుంపులు గుంపులుగా తిరుగుతున్నారని, లాక్‌డౌన్ లక్ష్యం నెరవేరట్లేదని పేర్కొంటున్నారు.

టైం సరిపోక ఆగమాగమైతున్నరు
ఈ నెల 12 నుంచి రాష్ట్రంలో లాక్​డౌన్ అమల్లోకి రాగా.. ఉదయం 6 నుంచి 10 గంటల వరకు సడలింపు ఇచ్చింది. కిరాణా షాపులు, కూరగాయల మార్కెట్లు, మాల్స్, మద్యం దుకాణాలు తెరుచుకునేందుకు పర్మిషన్ ఇచ్చింది. ఈ 4 గంటల టైంలోనే జనం ఒక్కసారిగా బయటకు వస్తుండటంతో దుకాణాలు, మార్కెట్లు కిటకిటలాడుతున్నాయి. అనేక చోట్ల గుమిగూడుతున్నారు. సోషల్ డిస్టెన్స్ పాటించట్లేదు. మాస్కులు సరిగా పెట్టుకోవట్లేదు. ఒకరి మీద ఒకరు పడి తోసుకుంటున్నారు. దీంతో వైరస్ విపరీతంగా స్ప్రెడ్ అవుతోంది. లాక్​డౌన్ ఉద్దేశం నీరుగారిపోతోందని జనం పేర్కొంటున్నారు. లాక్‌డౌన్ సడలింపు మరో రెండు గంటలు పొడిగిస్తే బాగుంటుందని అభిప్రాయపడుతున్నారు. 

లాక్‌డౌన్​ పొడిగింపుతో ఇబ్బందులు
లాక్‌డౌన్‌ను ఈ నెల 30 వ తేదీ వరకు పొడిగిస్తున్నట్లు సీఎం కేసీఆర్‌ ప్రకటించారు. దీనిపై జనాల నుంచి భిన్నాభిప్రాయాలు వినిపిస్తున్నాయి. లాక్​డౌన్​తో తాము తీవ్ర ఇబ్బందులు పడుతున్నామంటూ సోషల్ మీడియాలో కేసీఆర్‌, కేటీఆర్‌ అకౌంట్లలో కామెంట్స్‌ చేస్తున్నారు. ఉద్యోగాలు పోయి రోడ్డున పడుతున్నామని, తిండి లేక ఆకలితో అలమటిస్తున్నామని, కుటుంబం గడవడం కష్టంగా మారిందని ఆవేదన వ్యక్తం చేస్తున్నారు.