ఆపరేషన్ సిందూర్ తో సైనిక బలగాల ప్రతాపం ప్రపంచం చూసింది: పీఎం మోడీ

సోమవారం ( జులై 21 ) పార్లమెంట్ వర్షాకాల సమావేశాలు ప్రారంభమయ్యాయి. ఈ సందర్భంగా ప్రసంగించిన ప్రధాని మోడీ ఆపరేషన్ సిందూర్ పై కీలక వ్యాఖ్యలు చేశారు. ఆపరేషన్ సిందూర్ తో భారత సైన్యం తమ లక్ష్యాలను వంద శాతం పూర్తి చేసిందని అన్నారు. 22 నిమిషాల్లో శత్రుస్థావరాలను మన సైన్యం ధ్వంసం చేసిందని.. ఆపరేషన్ సిందూర్ తో భారత సైనిక బలగాల ప్రతాపం ప్రపంచం చూసిందని అన్నారు మోడీ. మేడ్ ఇన్ ఇండియా ఆయుధాలు ప్రపంచాన్ని ఆకర్షిస్తున్నాయని.. శాంతి, ప్రగతి భుజం భుజం కలిసి నడుస్తున్నాయని అన్నారు.

ఉగ్రవాదం, నక్సలిజం దేశాన్ని దశాబ్దాలుగా పట్టి పీడిస్తున్నాయని అన్నారు. ఇప్పుడు నక్సలిజాన్ని కూకటివేళ్లతో పెకిలిస్తున్నామని అన్నారు ప్రధాని మోడీ. దేశంలో వందలాది జిల్లాలు నక్సలిజం నుంచి విముక్తి పొందాయని అన్నారు. పహల్గామ్ క్రూరహత్యలను యావత్ ప్రపంచం చూసిందని.. పార్టీలకతీతంగా పలు పార్టీలు, పలు రాష్ట్రాల ప్రతినిధులు పలు దేశాల్లో పర్యటించి పాక్ ఉగ్రవాదంపై ప్రచారం చేసారని.. ఇందుకు అన్ని పార్టీలను అభినందిస్తున్నానని అన్నారు ప్రధాని మోడీ.

ఐకమత్యం శక్తి ఎలా ఉంటుందో ఈ దేశం చాటి చెప్పిందని అన్నారు మోడీ. అంతే కాకుండా శుబాంషు శుక్లా అంతరిక్ష యానాన్ని కొనియాడిన మోడీ.. అంతరిక్ష రంగంలో చరిత్ర సృష్టించిందని అన్నారు. ఇవాళ ప్రారంభం కానున్న పార్లమెంట్ వర్షాకాల సమావేశాలు ఆగస్టు 21 వరకు జరగనున్నాయి. ఈ సమావేశాల్లో.. మొత్తం 21 రోజులపాటు ఉభయ సభలు సాగనున్నాయి. పహల్గాం ఉగ్రదాడి, ఆపరేషన్‌‌ సిందూర్ తర్వాత తొలిసారి జరగనున్న ఈ సమావేశాలు వాడివేడిగా కొనసాగే అవకాశాలు కనిపిస్తున్నాయి. ఈ సెషన్లో 8 కొత్త బిల్లులతో పాటు 17 బిల్లుల‌‌ను ప్రవేశపెట్టాలని కేంద్ర ప్రభుత్వం యోచిస్తున్నది.

నేషనల్‌‌ స్పోర్ట్స్‌‌ గవర్నెన్స్‌‌ బిల్లు, జియోహెరిటేజ్‌‌ సైట్స్‌‌, జియో రెలిక్స్‌‌ (సంరక్షణ, నిర్హణ) బిల్లు, మైన్స్‌‌ అండ్‌‌ మినరల్స్‌‌ (అభివృద్ధి, నియంత్రణ) సవరణ బిల్లు, నేషనల్‌‌ యాంటీ డోపింగ్‌‌ (సవరణ) బిల్లు, మణిపూర్‌‌ వస్తు సేవల పన్ను (సవరణ) బిల్లు, ఇతర బిల్లులను ఉభయ సభల ముందుకు తెచ్చేందుకు సిద్ధమైంది. వీటితోపాటు ఇన్‌‌కంట్యాక్స్‌‌-–2025 బిల్లును కూడా కేంద్రం ప్రవేశపెట్టే అవకాశాలు ఉన్నాయని పార్లమెంట్ వర్గాలు చెబుతున్నాయి. అవినీతి ఆరోపణలు ఎదుర్కొంటున్న అలహాబాద్‌‌ హైకోర్టు సిట్టింగ్‌‌ న్యాయమూర్తి జస్టిస్‌‌ యశ్వంత్‌‌వర్మను అభిశంసించే తీర్మానం కూడా ఈ సమావేశాల్లోనే పార్లమెంటు ముందుకు రానుంది.

కేంద్రాన్ని నిలదీసేందుకు ప్రతిపక్షాలు సిద్ధం

ఆపరేషన్‌‌ సిందూర్ తర్వాత ప్రత్యేక సమావేశాలు ఏర్పాటు చేయాలని ఇండియా బ్లాక్ పార్టీలు ప‌‌ట్టుబట్టాయి. కానీ, కేంద్ర ప్రభుత్వం ఈ విజ్ఞప్తులను పక్కనపెట్టింది. భారత్‌‌, పాక్‌‌ యుద్ధంలో 5 యుద్ధ విమానాలు నేలకూలాయని అమెరికా అధ్యక్షుడు డొనాల్డ్‌‌ ట్రంప్ చేసిన వ్యాఖ్యలు, కాల్పుల విర‌‌మ‌‌ణ కామెంట్స్‌‌పై ప్రతిపక్షాలు నిల‌‌దీయ‌‌నున్నాయి.

పహల్గాం ఉగ్రదాడి, ఆపరేషన్‌‌ సిందూర్, బిహార్‌‌లో ఓటర్ల జాబితా ప్రత్యేక సమగ్ర సవరణ, జమ్మూకాశ్మీర్‌‌ రాష్ట్ర హోదా పునరుద్ధరణ అంశాలపై ప్రతిపక్షాలు చర్చలకు పట్టుబట్టే అవకాశాలు స్పష్టంగా కనిపిస్తున్నాయి. వీటితోపాటు మ‌‌హిళ‌‌ల‌‌పై దాడులు, నిరుద్యోగం, ధ‌‌ర‌‌ల పెరుగుద‌‌ల‌‌, వ్యవ‌‌సాయ సంక్షోభం, అహ్మదాబాద్‌‌లో ఎయిర్ ఇండియా విమానం కూలిపోయిన ఘ‌‌ట‌‌నలాంటి అంశాల‌‌పై కేంద్రాన్ని నిలదీసేందుకు ఇండియా కూటమి, ఇతర పార్టీలు సిద్ధమయ్యాయి.