ముంబై: ప్రధాని మోదీ నవంబర్ 3న మహారాష్ట్రలోని బారామతిలో పర్యటించనున్నారు. ఎన్సీపీ (ఎస్పీ) చీఫ్ శరద్ పవార్ అధ్యక్షతన నిర్వహిస్తున్న‘విద్యా ప్రతిష్ఠాన్’ సంస్థలో 9 అడుగుల ఎత్తు, 4 టన్నుల బరువున్న గౌతమ బుద్ధుడి విగ్రహాన్ని పీఎం ఆవిష్కరించనున్నారు.
శనివారం బారామతిలో జరిగిన ప్రెస్ కాన్ఫరెన్సులో శరద్ పవార్ ఈ పర్యటన వివరాలను వెల్లడించారు. విద్యా ప్రతిష్ఠాన్ పరిధిలోని నక్షత్ర గార్డెన్లో ఏర్పాటు చేసిన ఈ బుద్ధుడి విగ్రహం చుట్టూ జిజామాత, షాహూ మహారాజ్, మహాత్మా గాంధీ, డాక్టర్ బాబాసాహెబ్ అంబేద్కర్, భౌరావ్ పాటిల్, అన్నాభావు సాఠే, యశ్వంత్ రావ్ చవాన్, శారదాబాయి పవార్ తదితరుల చిత్రలేఖనాలను ప్రదర్శించనున్నారు.
ఈ కార్యక్రమానికి గవర్నర్ జిష్ణు దేవ్ వర్మ, సీఎం దేవేంద్ర ఫడ్నవీస్, డిప్యూటీ సీఎంలు ఏక్నాథ్ షిండే, సునేత్రా పవార్ తదితరులు హాజరుకానున్నారు. పొలిటికల్గా విభిన్న ధ్రువాలుగా ఉన్న మోదీ, శరద్ పవార్ ఒకే వేదికను పంచుకోనుండటం రాజకీయ వర్గాల్లో తీవ్ర ఆసక్తిని రేకెత్తిస్తోంది.
