ఎల్బీనగర్, వెలుగు : స్వాతంత్ర్య దినోత్సవం రోజున గిరిజన మహిళపై పోలీసుల దాడి ఘటన.. రాష్ట్ర సర్కారుకు సిగ్గుచేటని ఎమ్మెల్యేలు రఘునందన్ రావు, సీతక్క మండిపడ్డారు. కర్మన్ ఘాట్లోని జీవన్ హాస్పిటల్లో ట్రీట్మెంట్ తీసుకుంటున్న బాధితురాలు వడ్త్యా లక్ష్మీని దుబ్బాక ఎమ్మెల్యే రఘునందన్ రావు బీజేపీ నేతలతో కలిసి పరామర్శించారు. ఈ సందర్భంగా ఆయన మాట్లాడుతూ.. నంబర్ వన్ పోలీసింగ్ అంటే ఇదేనా అని ప్రశ్నించారు.
రాష్ట్రంలో మహిళలకు రక్షణ లేదనే విషయం ఈ ఘటనతో తెలుస్తోందన్నారు. సమగ్ర దర్యాప్తు చేపట్టి బాధ్యులపై చర్యలు తీసుకోవాలన్నారు. ములుగు ఎమ్మెల్యే సీతక్క కాంగ్రెస్ నేతలతో కలిసి బాధితురాలిని పరామర్శించారు. షీ టీం ఏర్పాటు చేసి మహిళలను రక్షిస్తున్నామని చెప్పుకుంటున్న పోలీసు వ్యవస్థ, మంత్రులు ఈ ఘటనపై ఎందుకు స్పందించడం లేదని ఆమె ప్రశ్నించారు.
