- కాళేశ్వరం, దాని బ్యారేజీల పరిస్థితిని
- వివరించనున్న మంత్రి ఉత్తమ్ కుమార్ రెడ్డి
- పర్యటనలో మంత్రి శ్రీధర్ బాబు,
- బ్యారేజీలు కట్టిన సంస్థల ప్రతినిధులు కూడా
హైదరాబాద్, వెలుగు: కాళేశ్వరం ప్రాజెక్టులోని ప్రధాన బ్యారేజీ మేడిగడ్డను ఈ నెల 29న రాష్ట్ర ఇరిగేషన్శాఖ మంత్రి ఉత్తమ్ కుమార్ రెడ్డి, ఐటీ ఇండస్ట్రీస్ శాఖ మంత్రి దుద్దిళ్ల శ్రీధర్బాబు పరిశీలించనున్నారు. అదే రోజు అక్కడే.. కాళేశ్వరం ప్రాజెక్టు, డాక్టర్ బీఆర్ అంబేద్కర్ ప్రాణహిత – చేవెళ్ల లిఫ్ట్ఇరిగేషన్స్కీంలపై మంత్రి ఉత్తమ్ పవర్ పాయింట్ ప్రజెంటేషన్ ఇవ్వనున్నారు. ప్రాణహితను కాళేశ్వరం ప్రాజెక్టుగా రీ డిజైన్ చేయడంతో కలిగిన లాభనష్టాలు.. పెరిగిన వ్యయం.. పెరిగిన భూసేకరణ భారం.. మేడిగడ్డ, అన్నారం, సుందిళ్ల బ్యారేజీల్లో తలెత్తిన సమస్యలు, వాటికి పరిష్కారాలను ప్రజెంటేషన్లో వివరించనున్నారు.
ఈ నెల 29న ఉదయం 9 గంటలకు హైదరాబాద్నుంచి ఇద్దరు మంత్రులు హెలికాప్టర్లో మేడిగడ్డకు బయల్దేరుతారు. మొదట.. కుంగిన మేడిగడ్డ బ్యారేజీలోని ఏడో బ్లాక్ను పరిశీలిస్తారు. అక్కడే బ్యారేజీ పునరుద్ధరణకు ఎలాంటి చర్యలు చేపట్టాల్సి ఉంది, నీటిని మళ్లించేందుకు ఎల్అండ్టీ సంస్థ చేపట్టిన మట్టికట్ట పనులు, అక్కడ చేపట్టాల్సిన ఇన్వెస్టిగేషన్స్తదితర అంశాలను తెలుసుకుంటారు. ఏడో బ్లాక్లోని పిల్లర్కుంగిన ప్రభావం ఎంత మేరకు పడింది, మిగతా బ్లాకుల పరిస్థితి ఏమిటీ అనే వివరాలు సేకరిస్తారు. ఆ తర్వాత బ్యారేజీ వద్దనే పవర్ పాయింట్ ప్రజెంటేషన్ను మంత్రి ఉత్తమ్ ఇస్తారు. రాష్ట్రంలోని ఇరిగేషన్ప్రాజెక్టులపై అధికారులు, ఇంజనీర్లతో సమీక్ష సమావేశం నిర్వహిస్తారు. అన్నారం బ్యారేజీని పరిశీలించి.. బుంగలు ఏర్పడిన బ్లాకుల వద్ద పరిస్థితిని తెలుసుకుంటారు. మేడిగడ్డ, అన్నారం బ్యారేజీలు నిర్మించిన కాంట్రాక్టర్లు, సబ్కాంట్రాక్టర్లు, నిర్మాణంతో సంబంధం ఉన్న అందరికీ సమాచారం ఇచ్చి వారంతా మంత్రుల పర్యటనలో పాల్గొనేలా చర్యలు తీసుకోవాలని ఇరిగేషన్ఈఎన్సీ (జనరల్) మురళీధర్ను మంత్రి ఉత్తమ్కుమార్రెడ్డి సోమవారం ఆదేశించారు. మంత్రుల మేడిగడ్డ బ్యారేజీ, కాళేశ్వరం ప్రాజెక్టు సందర్శనపై మీడియా కవరేజీకి అవసరమైన ఏర్పాట్లు చేయాలని, దీనిపై సమాచార పౌర సంబంధాల శాఖకు సమాచారం ఇవ్వాలని ఆయన చెప్పారు.
