తెలుగు సినీ ఇండస్ట్రీలో అత్యంత ఆకర్షణీయమైన , అభిమానుల మనసు దోచుకున్న ఆన్ స్క్రీన్ జోడీగా ప్రభాస్, అనుష్క శెట్టిలకు ప్రత్యేక స్థానం ఉంది. 'బిల్లా', 'మిర్చి', 'బాహుబలి' ఫ్రాంచైజీల వంటి చిత్రాలలో ఈ జంట కలిసి నటించి, వెండితెరపై సృష్టించిన అద్భుతం అంతా ఇంతాకాదు. అందుకే, అభిమానులు వీరిని ముద్దుగా 'ప్రనుష్క' అని పిలుచుకుంటారు. స్కీన్ పై వారిద్దరి కెమిస్ట్రీ , అనుబంధం చూసిన అభిమానులు వీరు నిజ జీవితంలో ఒక్కటైతే ఎంత బాగుండు అని నిత్యం కోరుకుంటారు.
అభిమానుల కల..
ప్రభాస్, అనుష్క శెట్టిల పెళ్లిని నిజ జీవితంలో చూడాలన్నది కోట్లాది మంది అభిమానుల కల. ఈ కల నిజం కావడం దాదాపు అసాధ్యమే అయినప్పటికీ, టెక్నాలజీ యుగంలో అసాధ్యం అంటూ ఏమీ లేదు. అందుకే ఎవరో ఒక సృజనాత్మక అభిమాని ఆర్టిఫిషియల్ ఇంటెలిజెన్స్ (AI) సహాయంతో ప్రభాస్, అనుష్కల వివాహ వేడుకను కళ్లకు కట్టేలా ఒక వీడియోను సృష్టించారు. ప్రస్తుతం ఈ వీడియో సోషల్ మీడియాలో వైరల్ గా మారింది. ఈ క్లిప్ ఫ్యాన్స్ దృష్టిని, హృదయాలను కొల్లగొడుతోంది
అతిరథ మహారథుల సందడి..
AI టెక్నాలజీని ఉపయోగించి సృష్టించిన ఈ వీడియో అద్భుతంగా, నమ్మశక్యం కాని విధంగా ఉంది. ఇది కేవలం ప్రభాస్-అనుష్కల పెళ్లి మాత్రమే కాదు, టాలీవుడ్, కోలీవుడ్ సినీ ప్రపంచంలోని అతిరథ మహారథులు అందరూ ఒకే వేదికపైకి వచ్చి ఈ వేడుకను పంచుకున్నట్లుగా చూపించడం ఈ వీడియోకే హైలైట్ నిలిచింది. వీడియోలో పెళ్లి మండపం, సందడి వాతావరణం, అతిథులతో నిండిన ప్రాంగణం... అచ్చం ఒక స్టార్ వెడ్డింగ్‌ని తలపిస్తోంది. ముఖ్యంగా, సినీ ప్రముఖుల పాత్రలను చూస్తే అభిమానులు ఆశ్చర్యపోవడం ఖాయంగా కనిపిస్తోంది.
ప్రత్యేక ఆకర్షణగా పవన్ , మహేష్ బాబు
ఈ క్యూట్ AI వీడియోలో, ప్రభాస్, అనుష్కల పెళ్లి వేడుకకు టాలీవుడ్‌తో పాటు భారతీయ సినిమాలోని దిగ్గజాలు హాజరై సందడి చేయడం హైలైట్. పెళ్లిలో డప్పు వాయిస్తూ, అతిథులకు వడ్డిస్తూ తారలు భాగమవడం కనుల విందుగా ఉంది. సూపర్ స్టార్ రజినీకాంత్, మలయాళ లెజెండ్ మోహన్‌లాల్ తమ చిరునవ్వులతో ఆశీర్వచనాలు అందిస్తుంటే, 'బాహుబలి' సృష్టికర్త ఎస్.ఎస్. రాజమౌళి, సంగీత దర్శకుడు ఎం.ఎం. కీరవాణి ఉల్లాసంగా సాంగ్ కు డ్యాన్స్ చేస్తూ కనిపిస్తారు. మెగాస్టార్ చిరంజీవి, హీరో రామ్ చరణ్ లు ముచ్చట్లు చెబుతూ, వేడుకను ఆనందిస్తున్నట్లుగా కనిపించారు. పవర్ స్టార్ పవన్ కళ్యాణ్ ,సూపర్ స్టార్ మహేష్ బాబులు ఇద్దరూ పక్కపక్కనే కూర్చుని ఆత్మీయంగా కబుర్లు చెప్పుకోవడం అభిమానులకు పండుగలా అనిపించింది
మరింత ఆసక్తికరంగా, ఈ వివాహానికి పట్టు పీతాంబరాలలో పంతులుగా వ్యవహరించింది ఎవరో కాదు .. సాక్షాత్తూ వివాదాస్పద దర్శకుడు రామ్ గోపాల్ వర్మ (RGV) ఈ వీడియోలో కన్పించడం... వేరే లెవల్ ట్విస్ట్ గా నిలిచింది. సంప్రదాయ వస్త్రధారణలో, పెళ్లి మంత్రాలు చదువుతూ ఆర్జీవీ కనిపించిన దృశ్యం చూసినవారికి నవ్వు తెప్పించింది.
RGV స్పందన.. "ఓ AI, ఇదెక్కడి చిత్రం?"
ఈ ఫ్యాన్ మేడ్ AI వీడియో కేవలం అభిమానులను మాత్రమే కాక, టాలీవుడ్ ప్రముఖులను కూడా ఆకట్టుకుంది. ముఖ్యంగా, వీడియోలో పంతులుగా కనిపించిన దర్శకుడు రామ్ గోపాల్ వర్మ దృష్టికి ఇది చేరింది. ఆయన ఈ వీడియోను చూసి ఆశ్చర్యపోయి, తనదైన శైలిలో ఎక్స్ వేదికగా స్పందించారు. "హే AI, ఇదేంటి?" అంటూ ఆ వీడియోను షేర్ చేస్తూ, తన ఆశ్చర్యాన్ని, ఆసక్తిని వ్యక్తం చేశారు. RGV లాంటి వ్యక్తి కూడా ఈ వీడియో గురించి మాట్లాడారంటే, దాని ప్రభావం ఎంత ఉందో అర్థం చేసుకోవచ్చు. ఇది AI టెక్నాలజీ ఎంత వేగంగా, ఎంత అద్భుతంగా కల్పిత ప్రపంచాలను సృష్టిస్తుందో తెలియజేస్తుంది.
Hey A I , what’s this ?😳 https://t.co/bYDFZa6e4J
— Ram Gopal Varma (@RGVzoomin) November 28, 2025
మొత్తానికి, ప్రభాస్-అనుష్కల పెళ్లి నిజంగా జరగకపోయినా, ఈ AI వీడియో వారి అభిమానులకు ఒక గొప్ప విందు భోజనంలాంటిది. ఈ వీడియో వారి కలలను, కోరికలను తాత్కాలికంగానైనా తీర్చి, వారి ఆనందానికి హద్దులు లేకుండా చేసింది. సాంకేతికత అందిస్తున్న ఇలాంటి అద్భుతాలు, అభిమానుల ప్రేమకు ప్రతిరూపాలుగా నిలుస్తున్నాయి.
కానీ ఈ AIతో సృష్టిస్తున్న వీడియోలు సెలబ్రిటీలను భయపెడుతున్నాయి. ఇటీవల పలురకాలుగా వీడియోలు, ఫోటోలు సృష్టించండం ఆందోళన కలిగిస్తోంది. సాంకేతికతను మంచికి ఉపయోగిస్తే పర్వాలేదు.. కానీ దుర్వినియోగం చేస్తే తీవ్ర పరిణామాలు ఎదుర్కొకతప్పదని నిపుణులు హెచ్చరిస్తున్నారు.
