పవర్ ఇంజినీర్స్ అసోసియేషన్ డిమాండ్
హైదరాబాద్, వెలుగు: బీఆర్ఎస్ ప్రభుత్వ కాలంలో అన్యాయంగా రివర్షన్ పొందిన తెలంగాణ విద్యుత్ ఉద్యోగులకు ప్రమోషన్లు కల్పించి న్యాయం చేయాలని స్టేట్ పవర్ ఇంజనీర్స్ అసోసియేషన్ డిమాండ్ చేసింది. ఆదివారం జెన్కో ఆడిటోరియంలో తెలంగాణ స్టేట్ పవర్ ఇంజనీర్స్ అసోసియేషన్ జనరల్ బాడీ సమావేశం జరిగింది. టీజీపీఈఏ ప్రెసిడెంట్ రత్నాకర్ రావు అధ్యక్షతన జరిగిన ఈ సమావేశానికి 800 మంది ఇంజనీర్లు హాజరై కీలక నిర్ణయాలు తీసుకున్నారు.
విద్యుత్ సంస్థలలో ట్రాన్స్ఫర్లు, ప్రమోషన్లు, ఏఈల నియామకం త్వరలో చేపట్టాలని డిమాండ్ చేశారు. రామగుండం పాత విద్యుత్ ప్లాంట్ల స్థానంలో చేపట్టే కొత్త థర్మల్ ప్లాంట్ను కూడా జెన్కో ఆధ్వర్యంలోనే చేపట్టాలన్నారు. కేంద్ర, రాష్ట్ర ప్రభుత్వ ఉద్యోగులకు 2004 ఆగస్టు 31 వరకు ఉన్న పెన్షన్ సౌకర్యం 1999 ఫిబ్రవరి 1 నుంచి 2004 ఆగస్టు 31 వరకు ఉన్న విద్యుత్ ఉద్యోగులకు కల్పించాలని డిమాండ్ చేశారు. ఏ.వెంకటనారాయణ రెడ్డి, పి సదానందం, కే అంజయ్య, శివశంకర్, మంగీలాల్, శ్రీనాథ్ రెడ్డి, జన ప్రియ, సామ్య నాయక్, ఎన్ సురేశ్ కుమార్, కె వెంకటేశ్వర్, విద్యుత్ సంస్థలకు చెందిన ఆఫీస్ బేరర్లు, బ్రాంచ్ ఆఫీస్ బేరర్లు సమావేశానికి హాజరయ్యారు.
