- ఓ సభలో మాట్లాడుతుండగానే అదుపులోకి తీసుకున్న ఈడీ
చండీగఢ్ : పంజాబ్ ఆమ్ ఆద్మీ పార్టీ(ఆప్) ఎమ్మెల్యే జస్వంత్ సింగ్ గజ్జన్ మజ్రాను ఎన్ఫోర్స్మెంట్ డైరెక్టరేట్(ఈడీ) అధికారులు అరెస్ట్ చేశారు. సోమవారం మలేర్కోట్లాలో జరుగుతున్న బహిరంగ సభలో జస్వంత్ మాట్లాడుతుండగానే అధికారులు ఆయనను అదుపులోకి తీసుకున్నారు. దీంతో అక్కడ కాసేపు ఉద్రిక్తత నెలకొంది. అయితే, జస్వంత్ సింగ్ను ఏ కేసులో అరెస్ట్ చేశారన్న విషయం అధికారులు వెల్లడించలేదు. కాగా, జస్వంత్ ను అరెస్ట్ చేసిన తీరును ఆప్ నేతలు తప్పుబట్టారు. తమ ప్రతిష్టను దిగజార్చే కుట్రలో భాగంగానే బీజేపీ ఇలా చేసిందని ఆరోపించారు. సభలో మాట్లాడుతుండగా జస్వంత్ ను అరెస్టు చేసి తీసుకెళ్లారని మండిపడుతున్నారు.
41 కోట్ల మోసం కేసు..
కిందటేడాది సెప్టెంబర్లో రూ.41 కోట్ల మోసానికి సంబంధించిన కేసులో సీబీఐ అధికారులు జస్వంత్ సింగ్ ఇంట్లో సోదాలు నిర్వహించారు. రూ. 16.57 లక్షల నగదు, ఫారిన్ కరెన్సీని స్వాధీనం చేసుకున్నారు. ఈ సోదాల ఆధారంగా ఈడీ అధికారులు జస్వంత్పై కేసు నమోదు చేశారు. విచారణకు రావాలని మూడుసార్లు పిలిచినప్పటికీ జస్వంత్ సింగ్ హాజరు కాలేదు. దీంతో ఆయనను అదుపులోకి తీసుకున్నట్లు సమాచారం.
