బషీర్ బాగ్, వెలుగు : నిరుద్యోగుల పోరాట ఫలితమే టెట్ నోటిఫికేషన్అని రాజ్యసభ సభ్యుడు, బీసీ సంక్షేమ సంఘం జాతీయ అధ్యక్షుడు ఆర్.కృష్ణయ్య చెప్పారు. రాష్ట్ర ప్రభుత్వం పీఆర్సీ రిపోర్టు ఆధారంగా 24 వేల టీచర్పోస్టులను భర్తీ చేయాలని విజ్ఞప్తి చేశారు. 11 వేల పోస్టులతో మెగా డీఎస్సీ ఎలా అవుతుందని ప్రశ్నించారు. శుక్రవారం కాచిగూడలో బీసీ యువజన సంఘం రాష్ట్ర అధ్యకుడు నీల వెంకటేశ్ఆధ్వర్యంలో సమావేశం జరిగింది. ముఖ్యఅతిథిగా ఆర్.కృష్ణయ్య పాల్గొని మాట్లాడారు. రాష్ట్రంలో 25 వేల టీచర్ పోస్టులు ఖాళీగా ఉన్నాయని ఉపాధ్యాయ సంఘాలు చెబుతున్నాయన్నారు.
టీచర్లు లేకుండా గవర్నమెంట్స్కూళ్లు ఎలా నడుపుతారని నిలదీశారు. ప్రస్తుతం ఎంత మంది టీచర్లు ఉన్నారో.. ఎంత మంది ప్రమోషన్లు పొందారో.. రిటైర్ అయినవారి సంఖ్యతో ప్రభుత్వం స్పష్టమైన ప్రకటన చేయాలని డిమాండ్ చేశారు. టీచర్లు లేకనే చాలా స్కూళ్లు మూతబడ్డాయని వాపోయారు. సీఎం రేవంత్రెడ్డి ఈ విషయంపై ప్రత్యేక దృష్టి పెట్టాలని సూచించారు. సమావేశంలో బీసీ సంక్షేమ సంఘం జాతీయ కన్వీనర్ గుజ్జ కృష్ణ, నాయకులు సుధాకర్, రామకృష్ణ, రాజ్ కుమార్, నందగోపాల్, ప్రభుగౌడ్, కృష్ణయాదవ్, జి.అనంతయ్య తదితరులు పాల్గొన్నారు.
