బాలీవుడ్ బ్యూటీ రాధికా ఆప్టే వరుస ఇంటర్వ్యూలు సినీ వర్గాల్లో చర్చనీయాంశంగా మారుతున్నాయి. తన కొత్త వెబ్ సిరీస్ ‘అక్కా’ ప్రమోషన్లలో భాగంగా ఆమె వెల్లడిస్తున్న విషయాలు టాలీవుడ్, బాలీవుడ్ వర్గాల్లో ఆసక్తిని రేకెత్తిస్తున్నాయి. ఇటీవల దక్షిణాది సినిమాల్లో ఉత్తరాది హీరోయిన్లకు అవకాశాలు రావడానికి వారి తెల్లటి చర్మం కూడా ఒక కారణమై ఉండొచ్చని అభిప్రాయపడిన రాధిక.. తాజాగా ఓ బాలీవుడ్ సినిమా సెట్‌లో తనకు ఎదురైన అసౌకర్యకరమైన అనుభవాన్ని బయటపెట్టింది. యాక్షన్ సీన్ కోసం బ్రా లేకుండా, షర్ట్ బటన్లు తెరిచి నటించాలని నిర్మాత, దర్శకులు తనపై ఒత్తిడి తెచ్చారని వెల్లడించింది. అంతేకాకుండా, నటీనటుల హద్దులు, అంగీకారాన్ని కాపాడాల్సిన ఇంటిమసీ కోఆర్డినేటర్లు సైతం నిర్మాతల ఒత్తిళ్లకు గురవుతున్నారని ఆమె చేసిన వ్యాఖ్యలు ఇప్పుడు హాట్ టాపిక్‌గా మారాయి.
యాక్షన్ సీన్‌లోనూ అలాంటి డిమాండ్లా?: రాధికా ఆప్టే
రీసెంట్గా ఇచ్చిన ఇంటర్వ్యూలో రాధికా ఆప్టే ఓ సినిమా షూటింగ్‌లో తనకు ఎదురైన అనుభవాన్ని వెల్లడించారు. ఓ యాక్షన్ సన్నివేశాన్ని బ్రా లేకుండా, షర్ట్ బటన్లు తెరిచి చేయాలని చిత్రబృందం కోరిందని తెలిపారు. యాక్షన్ సన్నివేశాల్లో శరీర కదలికల కారణంగా దుస్తులు కదిలే అవకాశం ఉంటుందని, అలాంటప్పుడు ఈ డిమాండ్ల వెనుక ఉద్దేశమేంటని తాను ప్రశ్నించినట్లు చెప్పారు.
గతంలో ఇచ్చిన ఓ ఇంటర్వ్యూలోనూ ఈ ఘటన గురించి రాధిక మాట్లాడారు. యాక్షన్ సీన్‌ను బ్రా, లోదుస్తులతో చేయాలని అడిగినప్పుడు, ఆ సన్నివేశానికి అలాంటి దుస్తులు ఎందుకు అవసరమని ప్రశ్నించినట్లు వెల్లడించారు. పాత్రలో ఎక్స్‌పోజింగ్ ఎంతవరకు అవసరమో సినిమా ఒప్పుకునే ముందే స్పష్టంగా చెప్పాలని, షూటింగ్‌కు ముందు చివరి నిమిషంలో ఇలాంటి డిమాండ్లు చేయడం ఇబ్బందికరమని ఆమె అభిప్రాయపడ్డారు.
రెండు వారాల పాటు అదే చర్చ.. తీవ్రంగా ఇబ్బంది పడ్డా!
ఒక పాత్రలో న్యూడిటీ లేదా ఎక్స్‌పోజింగ్ అవసరమైతే ఆ విషయాన్ని ముందుగానే స్పష్టంగా చెప్పాలని రాధికా ఆప్టే తెలిపారు. సినిమా ఒప్పుకున్న తర్వాత, షూటింగ్‌కు రెండు రోజుల ముందు కొత్త డిమాండ్లు చేయడం ఇబ్బందికరమని పేర్కొన్నారు. తాను ఎంతవరకు ఎక్స్‌పోజింగ్ చేయాలనే విషయంపై దాదాపు రెండు వారాల పాటు చర్చ జరిగిందని వెల్లడించారు. ఏయే భాగాలు కనిపించాలంటూ పదేపదే ప్రశ్నించడం తనకు తీవ్ర మానసిక ఒత్తిడిని కలిగించిందని, ఆ అనుభవం ఎంతో బాధాకరంగా అనిపించిందని రాధిక ఆవేదన వ్యక్తం చేశారు.
ఇంటిమసీ కోఆర్డినేటర్లకూ తప్పని ఒత్తిళ్లు..
సినిమాల్లో సన్నిహిత సన్నివేశాలను నటీనటుల అంగీకారంతో చిత్రీకరించేందుకు ఇంటిమసీ కోఆర్డినేటర్లను నియమిస్తారు. అయితే, నిర్మాతల డిమాండ్లను వ్యతిరేకిస్తూ నటీనటులకు మద్దతుగా నిలిచిన కోఆర్డినేటర్లను తొలగించడం తాను చూశానని రాధికా ఆప్టే తెలిపారు. మరికొందరు ఒత్తిడితో తమ వైఖరిని మార్చుకోవాల్సి వస్తోందని చెప్పారు. వారి నియామకంతో కొంత మార్పు వచ్చినప్పటికీ, నటీనటులకు పూర్తి రక్షణ లభిస్తోందని చెప్పలేమని ఆమె అభిప్రాయపడ్డారు.
సౌత్లో ఫ్రెండ్లీగా ఉంటూనే ఫేవర్స్ అడుగుతారు..
‘అక్కా’ ప్రమోషన్లలో భాగంగా రాధికా ఆప్టే చేసిన మరో కామెంట్ కూడా చర్చనీయాంశమైంది. దక్షిణాది సినిమా సెట్స్‌లో చాలామంది తనతో ఆప్యాయంగా ఉంటారని, కుటుంబ సభ్యురాలిలా చూస్తారని రాధికా ఆప్టే గుర్తుచేసుకున్నారు. అయితే, ఆ చనువును ఆధారంగా చేసుకుని తమ కోసం కొన్ని పనులు చేయాలని కోరడం తనకు నచ్చదని తెలిపారు. స్నేహపూర్వక సంబంధాలున్నప్పటికీ, వృత్తిపరమైన హద్దులను గౌరవించడం ముఖ్యమని ఆమె అభిప్రాయపడ్డారు. ‘రక్త చరిత్ర’, ‘ధోని’, ‘లెజెండ్’, ‘కబాలి’ వంటి సినిమాలతో తెలుగు, తమిళ ప్రేక్షకులకు దగ్గరైన రాధిక.. ప్రస్తుతం తన తాజా ప్రాజెక్టుల ప్రమోషన్లలో బిజీగా ఉన్నారు.
