కరువు పరిస్థితులు, ఎల్‌నినో ప్రభావం కారణంగా ఈ ఆర్థిక సంవత్సరంలో భారత్ తన అవసరాల కోసం ఫుడ్, పశువుల దాణా, వ్యవసాయ ముడిసరుకుల దిగుమతులను భారీగా పెంచే అవకాశం ఉంది. దేశీయంగా పంట దిగుబడి తగ్గిపోతుండటం, ఉత్పత్తి ఖర్చులు విపరీతంగా పెరుగుతుండటంతో ఇండస్ట్రీలు దిగుమతుల వైపు మొగ్గు చూపుతున్నాయి. ముఖ్యంగా వరి, పప్పుధాన్యాలు, నూనెగింజలు, చెరకు వంటి అత్యవసర పంటల ఉత్పత్తి తీవ్రంగా దెబ్బతినడంతో కిచెన్ బడ్జెట్‌పై దిగుమతుల భారం మరింత పెరగనుంది.
మరాఠ్వాడా, విదర్భ, తెలంగాణ, మధ్యప్రదేశ్ వంటి ప్రాంతాల్లో కరువు ఛాయల కారణంగా సోయాబీన్ పంట పూర్తిగా ఎండిపోయింది. దీనివల్ల ఆఫ్రికా దేశాల నుంచి సోయాబీన్ దిగుమతులు రికార్డు స్థాయికి చేరుకున్నాయి. మరోవైపు ఖరీఫ్ వేరుశనగ ఉత్పత్తి 20 శాతానికి పైగా పడిపోయే అవకాశం ఉందని సాల్వెంట్ ఎక్స్‌ట్రాక్టర్స్ అసోసియేషన్ అంచనా వేసింది. దేశీయ నూనెగింజల ఉత్పత్తి క్షీణించడంతో ఎడిబుల్ ఆయిల్ దిగుమతులు గతేడాది ఉన్న 16.5 మిలియన్ టన్నుల నుంచి ఈ ఏడాది 17.5 మిలియన్ టన్నులకు పెరిగే అవకాశం ఉందని సన్‌విన్ గ్రూప్ సీఈఓ సందీప్ బజోరియా స్పష్టం చేశారు.
ఈ సంక్షోభం పశుపోషణ రంగాన్ని కూడా తీవ్రంగా కుదిపేస్తోంది. పౌల్ట్రీ ఫీడ్‌లో కీలకమైన సోయాబీన్ మీల్, మొక్కజొన్న ధరలు విపరీతంగా పెరగడంతో.. షార్టేజీని తప్పించేందుకు 30 లక్షల టన్నుల సోయాబీన్ మీల్ దిగుమతులకు అనుమతించాలని కాంపౌండ్ లైవ్‌స్టాక్ ఫీడ్ మ్యానుఫ్యాక్చరర్స్ అసోసియేషన్ ప్రభుత్వాన్ని కోరింది. లేనిపక్షంలో పౌల్ట్రీ ఉత్పత్తుల ధరలు అడ్డూఅదుపు లేకుండా పెరిగి రైతులకు భారీ నష్టం వాటిల్లుతుందని హెచ్చరించారు. ఇదే క్రమంలో మోడీ సర్కార్ మొక్కజొన్నలను ఇథనాల్ ఉత్పత్తికి మళ్లిస్తుండటంతో చైనా నుంచి స్టార్చ్ దిగుమతి చేసుకోవాల్సిన దుస్థితి ఏర్పడింది.
ఎల్‌నినో ఎఫెక్ట్ మన వ్యవసాయ రంగాన్ని ఎలా కోలుకోలేని దెబ్బతీసిందో ఈ పరిస్థితులు చెబుతున్నాయి. స్వయంసమృద్ధి సాధించిన ఆహార రంగంలో ఇప్పుడు దిగుమతులపై ఆధారపడటం అనివార్యమవుతోంది. దేశీయ డిమాండ్‌ను తట్టుకుని, ద్రవ్యోల్బణాన్ని నియంత్రించాలంటే ప్రభుత్వం వెంటనే దిగుమతి విధానాలను అవలంబించాల్సిన అవసరం ఉందని ఇండస్ట్రీ వర్గాలు సూచిస్తున్నాయి. లేటు చేసిన ప్రతి రోజూ దిగుమతి ఖర్చు పెరుగుతుందని సర్కార్ గమనించాలని హెచ్చరిస్తున్నారు.
