- తెలంగాణలో ఆ పార్టీ ఉనికే ఉండదు : రఘునందన్రావు
హైదరాబాద్, వెలుగు : పార్లమెంటు ఎన్నికల్లో రాష్ట్రంలో బీఆర్ఎస్ ఒక్కసీటు కూడా గెల్వదని, ఈ ఎన్నికల తర్వాత తెలంగాణలో బీఆర్ఎస్ తన ఉనికిని కోల్పోవడం ఖాయమని బీజేపీ రాష్ట్ర కార్యదర్శి రఘునందన్ రావు అన్నారు. చేతనైతే కేసీఆర్ కుటుంబంలోని ఐదుగురు నాయకులు లోక్సభ ఎన్నికల్లో పోటీ చేయాలని సవాల్ విసిరారు. కేసీఆర్, కేటీఆర్, హరీశ్, కవిత, సంతోష్లలో ఎవరు పోటీ చేసినా ఒక్కరు కూడా గెలవరన్నారు. ఏ ఒక్కరు గెలిచినా.. దేనికైనా సిద్ధమేనని చాలెంజ్ చేశారు. శనివారం బీజేపీ స్టేట్ ఆఫీసులో మీడియాతో ఆయన మాట్లాడారు.
బీఆర్ఎస్ అధికారంలో ఉన్నప్పుడే సారు.. కారు.. పదహారు.. ఢిల్లీలో సర్కారు.. అని ప్రచారం చేసుకుంటేనే ఆ పార్టీకి తెలంగాణ ప్రజలు సింగిల్ డిజిట్కు పరిమితం చేశారని, ఇప్పుడు కేంద్రంలో బీజేపీ, రాష్ట్రంలో కాంగ్రెస్ ఉండగా.. బీఆర్ఎస్ను తెలంగాణ ప్రజలు ఎందుకు గెలిపించాలని ప్రశ్నించారు. టీఆర్ఎస్ నుంచి బీఆర్ఎస్గా మారినప్పుడే తెలంగాణతో ఆ పార్టీకి ఉన్న పేగు బంధం తెగిపోయిందన్నారు.
వచ్చే ఎన్నికల్లో బీఆర్ఎస్ కు ‘సున్నా’ను గుర్తు చేయాలని ప్రజలను కోరారు. ఓడినా కూడా కేటీఆర్లో గర్వం తగ్గలేదని మండిపడ్డారు. కేసీఆర్ పులి కాదు.. పిల్లి కాదు.. సందులో చొచ్చే ఎలుక అని ఎద్దేవా చేశారు.
