రైల్వేలో నేరాలు తగ్గినయ్.. నేరాల నియంత్రణకు పటిష్ట చర్యలు తీసుకుంటున్నం: రైల్వే ఎస్పీ చందనా దీప్తి

పద్మారావునగర్, వెలుగు: రైల్వే ప్రయాణికుల భద్రతతో పాటు నేరాల నియంత్రణకు జీఆర్పీ పోలీసులు కఠిన చర్యలు తీసుకుంటున్నారని రైల్వే ఎస్పీ చందనా దీప్తి తెలిపారు. లాలాగూడలోని రైల్వే ఎస్పీ కార్యాలయంలో బుధవారం నిర్వహించిన జీఆర్పీ వార్షిక సమీక్ష సమావేశంలో ఆమె మాట్లాడారు. రైల్వే పరిధిలో ఈ ఏడాది నేరాల సంఖ్య తగ్గిందన్నారు. 

2024లో 2,835 కేసులు నమోదు కాగా, 2025లో 2,607 కేసులు నమోదైనట్లు వెల్లడించారు. ఆర్పీఎఫ్ సహకారంతో నిఘా పెంచి నేరాలను అరికట్టినట్లు చెప్పారు. ప్రాపర్టీ నేరాలు, ఎన్డీపీఎస్ కేసులు, మొబైల్ చోరీలు, కిడ్నాప్​లపై ప్రత్యేక దృష్టి పెట్టినట్లు తెలిపారు. 

ఎంఎంటీఎస్ ట్రైన్ ఇష్యూ ఫేక్ కంప్లైంట్​గా తేలిందని, యువతి సెల్ఫీ వీడియోలు తీసుకుంటూ పడిపోయిందని ఎస్పీ వెల్లడించారు. అలాగే శంకరపల్లి ట్రాక్​పై కారు నడిపిన మహిళ మెంటల్ డిస్టర్బెన్స్‌తో ఉన్నట్లు విచారణలో తేలిందని చెప్పారు. రైల్వే ప్రయాణికులకు సమస్యలు ఎదురైతే 139 హెల్ప్‌ లైన్ కు సమాచారం ఇవ్వాలని సూచించారు. ఈ సమావేశంలో డీఎస్పీలు ఎస్.ఎన్. జావెద్ (అర్బన్), శ్రీనివాసరావు (రూరల్), ఇన్​స్పెక్టర్లు సాయి ఈశ్వర్ గౌడ్, ఆర్. ఎల్లప్ప, ఖాదర్ హుస్సేన్ తదితరులు పాల్గొన్నారు.

మొబైల్ రికవరీ: సికింద్రాబాద్ రైల్వే డిస్ట్రిక్ట్​లో 2023 నవంబర్ నుంచి ఇప్పటివరకు సీఈఐఆర్ పోర్టల్ ద్వారా 1,322 మొబైల్ ఫోన్లు గుర్తించి యజమానులకు అప్పగించారు. 2025లోనే 572 ఫోన్లు రికవరీ చేశారు. 
ఎన్‌డీపీఎస్ కేసులు: 2025లో 54 కేసులు నమోదు చేసి 70 మందిని అరెస్టు చేశారు. వారి నుంచి రూ.2.04 కోట్ల విలువైన 817 కేజీల గంజాయి స్వాధీనం చేసుకున్నారు. రూ.5 కోట్ల విలువైన 2,010 కేజీల గంజాయిని ధ్వంసం చేశారు.

మరణాలు: 2025లో 1,317 మరణాలు నమోదు కాగా, వీరిలో 1,058 మందిని గుర్తించారు. వీరిలో 629 మంది ప్రమాదాల్లో మృతి చెందగా, 529 మంది ఆత్మహత్యలు చేసుకున్నారు.

చిల్డ్రన్ రెస్క్యూ: ఆపరేషన్ స్మైల్, ముస్కాన్ ద్వారా 425 బాలురు, 75 బాలికలు కలిపి 500 మంది పిల్లలను రక్షించి సీడబ్ల్యూసీ కేంద్రాలకు తరలించారు.

ప్రాపర్టీ నేరాలు: 1,034 కేసులు నమోదు కాగా 27.50 శాతం ఛేదించారు. రూ.4.90 కోట్ల నష్టం జరిగినా 9.65 శాతం ఆస్తి రికవరీ చేశారు. సీసీ కెమెరాల్లో ఫేస్ రికగ్నిషన్ సాఫ్ట్‌వేర్ ఉపయోగంతో నేరస్థులను గుర్తిస్తున్నట్లు ఎస్పీ తెలిపారు.